Identiti nembiak mit ti kena jamah, diperinsa enda patut dikerembai

MIRI: Raban media patut nyeliahka diri ari ngeluar, nabur tauka ngerembaika identiti nyengkaum gambar nembiak mit ti bekaul enggau ba kes jamah tauka diperinsa.

Menteri Muda Dagang Temuai, Seni enggau Main Asal, Datuk Lee Kim Shin madah enti pekara nya nyadi, iya ngelanggar Seksyen 15 Akta Kanak-Kanak (Ubah) 2016.

“Sebarang pekara ti ngelanggar perkara tu, ngereja penyalah lalu pengudah dituku salah tau ditinggang ukum enda ngelui ari RM10,000 tauka jil enda ngelui ari lima taun,” ku iya.

Kaban Kunsil Nengeri (ADUN) Senadin mansutka jaku nya rambau Pengawa Bejadika Bengkel Ngenegapka Raban Nyaga, Ngintu Pengelantang enggau Palan Aktiviti Nembiak Mit malam kemari.

Pia mega ku iya, sebarang ripot media pasal penerang nembiak mit baka mantaika gambar, nama, alai diau tauka endur belajar ti tau ngasuh nembiak mit nya dikelala sekalika maya pansik dipejalai tauka renggat sebedau dipechara tauka pengudah dipechara enda tau dikeluar.

Taja pia ku iya, media tetap bejalaika pangku pengawa beguna amat ba pengawa meri penyedar ba kes nyamah ngagai bala komuniti.

“Penerang media ulih matak perati enggau kerejasama komuniti ngambi mantu pulaika pengelikun bala nembiak ti lenyau tauka ditaban,” ku iya madah nyemetak.

Berebak enggau nya, raban media mega patut nyekat program ti kasar ti tau malut runding mensia mayuh.

“Anang ngasuh kes penyalah nembiak mit enggau gangguan seksual nyadi fobia ngagai apai indai pasal pengelikun anak sida,” ku iya.

Raban Nyaga Nembiak Mit (PPKK) enggau Raban Ngintu Pengelantang Nembiak Mit (PKKK) Miri mantu Opis Ngintu Pengelantang Mensia Mayuh (JKM) mutarka kes ngaul nembiak mit.

“Pia mega, pengawa numbuhka Palan Aktiviti Nembiak Mit (PAKK) ba endur bisi risiko mega ulih mantu nembiak mit ari reregap tauka ngereja ulah enda menuku,” ku iya nerang.

PAKK mega ku iya, tau nyadi palan transit tauka ngenduh sebedau tauka pengudah jam sekula, berindik ari Miri bisi dua buah PAKK.

Sama datai Chairman PPKK Bagi Menua Miri, Dr Faizul Mansoor sereta bala kaban PPKK, PKKK enggau PAKK Bgi Menua Miri.