Chara perintah ngambi bayar PTPTN diterima enggau manah

MIRI: Raban ti nginjau ba Opis Wang Turu Pelajar Tinggi Nasional (PTPTN) nerima manah pengawa dipejalaika perintah mayar pulai chara mutung nitihka selang antara dua enggau 15 peratus ari penatai pemisi ninting bulan sida.

Safini Morni, 28, madahka chara mutus terus ari gaji manah agi ari mayar chara manual ngambika sida ti nginjau nadai betimbun bayar nya.

“Endang manah dipejalai ari suba laban sistem mayar pulai PTPTN bisi ari chara nya ti nadai caj tambah maya mayar.

“Taja pia, aku enda entu setuju enti sida ti nginjau ti begaji chukup RM1,000, dipinta mutung gaji dikena mayar PTPTN, laban sida ti bejagi taka nya, belanja mayuh dikena bebayarka pekara bukai mega, kelebih agi ungkus belanja idup majak niki,” ku iya madah ngagai Utusan Borneo kemari.

Seraya siku agi ti nginjau, Mohamad Firdhaus Ishak, 26, madahka putung beselang tu deka mantu ngurangka tating utang menua.

“Sida ti udah bulih kereja, nyadi tanggungpengawa mayar pulai utai ti udah dipinjau sida.

“Sistem ti deka dipejalai tu ila deka ngemuntangka agi sida ti nginjau laban enda bekenaka internet mayar nengah online, semina diputung terus ari gaji. Penyampau peratus diputung pen baruh,” ku iya.

Ku iya, iya sedar ke amat PTPTN ari suba udah bisi chara mayar diputung ari gaji, tang ku iya, ketegal penekul jam gawa laban kereja ngujungka iya nadai awak limpang ngelawa opis PTPTN ngerejista diri mayar chara nya.