Program CERT chukup manah, lengkas mantu maya bisi tasah
KAPIT: Dorainah Labing ari Unit Pengelikun enggau Penerit Adat Nengeri Opis Kepala Menteri madahka Tim Mutarka Penusah Ngenyit Komuniti (CERT) iya nya Program Meri Penyedar tuju iya ngajar enggau matih raban volunteer komuniti ti ulih datai ngesah enggau mantu bala komuniti sida empu maya bisi penusah enda disadang.
Ku iya, program CERT mega ngenegapka pengulih ngesah penusah ngenyit datai ari bala komuniti ti diau di kandang menua pesisir nengeri tu.
Iya madahka bala penyereta CERT udah dilatih pasal bantu keterubah tauka first-aid, baka ni ngaga Ngidupa Seput Lengkas (CPR) ti betul, atur pengelikun kereban karan enggau kesedaran penusah angus maya penusah bah tunggal tauka angus nyadi.
Iya meri terima kasih ngagai raban Petronas ti udah gerah jari ngagihka perengka pengerara api, first aid kits, safety helmets, safety vests enggau life jackets ngagai bala penyereta. Raban Petronas mega bekunsika penerang pasal pengelikun Liquefied Petrol Gas (LPG) ngagai bala penyereta CERT.
Dorainah mansutka jaku rambau pengawa nutup program CERT tiga hari berunggu ti digulu 119 iku bala ketuai renggat baruh enggau bala ketuai komuniti ari 73 buah genturung pendiau ba sitak N63 Bukit Goram. Bala sida tu udah dilatih pasal CERT ti datai ba pengujung pengawa numbuhka CERT Bukit Goram.
Kaban Kunsil Nengeri (ADUN) Bukit Goram Jefferson Jamit Unyat udah bejadika pengawa nutup Program Latih enggau Ngelanchar CERT sitak Bukit Goram ba Bilik Mayuh Guna, Ringkat Dua, Opis Pelilih Kapit, Komplek Nengeri Bletih ditu.
Ku Dorainah, program kesedarka CERT nyikap bala komuniti nyendiaka diri napi penusah nyenyit sereta nerenakka semengat volunteer ngagai bala kaban komuniti.
“Ari pemisi pengelandik ti dipelajar bala komuniti rambau program CERT, dikearap sida ulih mantu diri empu, sida sebilik enggau raban diau besemak maya penusah ngenyit nyadi. Genap iku kitai ba komuniti dipinta sikar mutarka penusah ti nyadi ngambi ulih ngelempungka penusah, pengerugi enggau pengerusak,” ku Dorainah nerang.
Program CERT inisiatif dipejalaika Perintah Nengeri di baruh Unit Pengelikun enggau Penerit Adat Nengeri Opis Kepala Menteri.
Bakih kunsi besai program CERT iya nya Petronas, Polis DiRajaya Malaysia (PDRM), Opis Pengerara Api enggau Penyah Penusah (Bomba), Opis Ngintu Pengelantang Nengeri, Opis Pengerai enggau Raban Nyaga Pengelikun Mensia Mayuh Malaysia (APM).
Sama bisi datai rambau pengawa nutup program iya nya Eksekutif Kanan Wilayah Komunikasyen Strategi Petronas CSI, Ekni Haji Raduan, Pemesai Pelilih Kapit Elvis Didit, Dorainah Labing ti ngarika Direktor Unit Pengelikun enggau Penerit Adat Nengeri Opis Kepala Menteri, Dato’ Dr Chai Khin Chung, pemesai Pengatur Pengawa Opis Pelilih Kapit, Bidah Lujah enggau Mohd Shukri, Pemesai Bomba Kapit, Erwandy Tugor, Pemesai Khas (SB) Opis Polis Kapit, ASP Chua Su Hua, Temenggong Wilfred Billy Panyau, Pemancha Haji Wasli Nor, Pemancha Yong thu Fook, Pemancha Enggin Nyipa, Penghulu Haji Abang Hmazah Bolhassan, Penghulu Sia Shui Poh, Penghulu Wong Kie Ing, Penghulu Pasang Tubak, Penghulu Undie Bajal, Penghulu Bunsu Gerinang, sereta bala bukai.