Tu dikena mantu rayat ba sitak tu ngepunka pengawa nanam rian Musang King berindik ari rega eksport ti besai: Uggah
KUCHING: Sepenyampau RM2.5 juta deka diagih ngagai sitak Parlimen Betong dikena rayat ngepunka pengawa nanam Rian Musang King berindik ari pengulih rega eksport ti besai, ku Sapit Kepala Menteri, Datuk Amar Douglas Uggah Embas.
Bejaku rambau pengerami makai lemai Saribas Social and Recreational Club Kuching ditu malam Hari Enam, iya madahka penyampau belanja nya udah dikemendarka Kepala Menteri Datuk Patinggi Abang Johari Tun Openg.
“Urung 1,000 paung udah disadung ngagai bala pekebun raban keterubah ari pengawa ngagih di baruh program tu,” ku iya.
Uggah, ti mega Menteri Betanam Betupi Moden, Tanah Adat enggau Pemansang Kandang Menua, minta kelab rama ngarika komuniti menua pesisir ngaum aktiviti ekonomi mansutka penatai pemisi ba lis program sida.
Ku iya, kelab baka tu tau nyerungkai enggau ngaul diri ba aktiviti betanam betupi moden baka betanam chara fertigasyen enggau hidroponik ti enda begunaka dandang besai tauka orang gawa.
Belalauka pekara tu, chara tu tau mansutka asil enggau kualiti manah agi ari chara lama ti ngemai penatai pemisi manah agi sereta standard idup meruan agi.
Ku iya, sida ti bisi ati tau minta lalau enggau iring ari opis menteri iya.
Iya mega madahka Kepala Menteri empu deka bejalai gawa ngelakuka aktiviti tu ti antara bukai startegi besai iya ba pelin transformasyen menua pesisir perintah.
“Iya mega apin lama ke udah bisi ngemendarka puku RM200 juta ungkup sektor betanam betupi nengeri. Iya mega udah ngagih kediri RM100 juta agi ungkup subsidi,” ku Uggah.
Ba lansa bukai, Uggah minta peranak ba sitak Saribas seruran begempung teguh lalu meri sukung tegut ngagai perintah nengeri GPS ke diatu di baruh pegai Abang Johari.
Ku iya, penuduk Parlimen Betong udah nerima abis nadai RM458.6 juta ari kepala mengeri dikena ngaga tauka kereja nyeleti infrastruktur.
Nambahka nya ku iya, empat pengari rayat GPS udah diagih RM5 juta siku ba bajet ninting taun dikena mantu rayat.
“Tu enda madahka Abang Johari tentu bisi mayuh agi program enggau projek pemansang ungkup kitai ba taun deka datai. Nya alai, kitai semina terus meri sukung tegut ngagai iya enggau perintah iya,” ku Uggah.
Ngelansa pasal Saribas Club, iya berasai lantang beratika sida udah ngerembai ari penegap. Ku iya, tu dipunka ex- Sapit Kepala Menteri Datuk Patinggi Tan Sri Alfred Jabu Numpang urung 24 taun ke udah dikena ngempung enggau ngetanka kaul antara sida ti datai asal ari mayuh bengkah menua lalu diatu bekereja tauka diau ba mengeri.
“Ketuai sida udah chakah gawa ngelakuka penyulut ba pelajar nengah kelasd tuisyen sereta mega kereja manik enggau nyulum ubung ngagai bala kaban.”
Iya udah nya ngemendarka geran perintah penyampau RM40,000 ngagai kelab seraya Kaban Parlimen (MP) Betong Datuk Robert Lawson Chuat ngemendarka RM20,000 enggau Kaban Kunsil Nengeri ( ADUN) Layar Gerald Rentap ngemendarka RM10,000.
Uggah, nambahka nya, mega ngemendarka geran bukai penyampau RM30,000 ngagai koperasi sida.
Iya mega nyuaka anugerah pengulih pemadu tinggi ngagai 73 iku nembiak enggau penerima nyengkaum dua iku lutur perubat enggau siku penerima PhD ari serata menua.
Sama datai Jabu enggau bini iya, Tan Sri Empiang Jabu, Robert Lawson, Gerald Rentap, chairman kelab, Andrew Bangkam Bejie, Sekretari Politik Kepala Menteri Dr. Richard Rapu, Residen Betong Friday Bilek enggau Residen Bintulu Jack Aman.