Program Mini Ekspedisi Saintifik ngagai Taman Negara Bukit Kana diatur 3-11 Nov
TATAU: Opis Kampung Nengeri Sarawak enggau kerejasama Opis Sains Kampung Universiti Putra Malaysia (UPM) Kampus Bintulu udah ngatur Mini Ekspedisi Saintifik ngagai Taman Negara Bukit Kana.
Pemantu Direktor Kampung Kanan (Bagi Pekara Taman Negara enggau Jelu Siga) Sarawak, Azahari Omar madahka, ekspedisi nya diatur dikena ngelala sereta ngerikod penyelai utai idup enggau utai tumbuh ti bisi ba taman negara nya.
“Batang tuju ekspedisi iya nya nyerungkai enggau mansik pengulih pemansut penyelai ti bisi ba Taman Negara Bukit Kana tu,” ku iya nerang.
Azahari mansutka jaku nya lebuh bejadika Program Mini Ekspedisi Saintifik Taman Negara Bukit Kana diatur Opis Kampung Sarawak enggau kerejasama Opis Sains Kampung UPM Kampus Bintulu kemari.
Ekspedisi nya berambaika jaku ‘Unlocking The Secret of Bukit Kana National Park’ berengkah ari 3 nyentuk 11 November tu disereta sepenyampau 30 penyereta datai ari bala nembiak, pengelicha enggau staf UPM Kampus Bintulu.
Ku Azahari, Taman Negara Bukit Kana ba sitak Sangan, Pelilih Tatau lalu udah digazet kena 15 Januari 2015 enggau 4,923 hektar pemesai.
“Taman Negara Bukit Kana nyadi siti ari 42 taman negara ti bisi ba Sarawak. Agi tubah pengelain utai tumbuh enggau utai idup ba Taman Negara Bukit Kana apin diserungkai enggau dirikot,” ku iya.
Nitih ku iya, bidang ti deka dipansik ba ekspedisi nya iya nya botani, sains tanah, serangga, kayu herba, jelu siga, kayu, palma enggau ke bukai.
“Asil pansik tu ila deka dikena ngintu enggau nyaga Taman Negara Bukit Kana.
“Kelimpah ari nya, iya mega deka nyadi pun dikena ngenegapka Pelin Ngintu Taman Negara Bukit Kana,” ku iya nerang.
Pia mega ku iya, Opis Kampung Sarawak siru amat pengawa nyaga enggau ngintu kampung seriris enggau juluk perintah ti ngazet sepenyampau 1 juta hektar sitak dijaga.
“Juluk tu nyengala dibantai ba juluk Opis Kampung iya nya ‘Achieving Excellent In The Managment Of Conservation Of Tropical Forest’,” ku iya.
Sama datai Ketuai Opis Sains Kampung UPM Kampus Bintulu Dr Roland Kueh Jui Heng, Pemangku Pemesai Pelilih Tatau Mohammad Dino, Ketuai Polis Pelilih Tatau DSP Denis Bunyam, Pemesai Pelajar Bagi Menua Fred Entau enggau Penghulu Micheal Agul.