40 kaban STU Sri Aman ngulu Licha Pasal Pemaik Polisi Insurans

KUCHING: Gerempung Pengajar Sarawak (KGS) meri terima kasih ngagai Perintah Besai laban ngagihka belanja penyampau RM60.2 billion, ungkup sektor pelajar ba Bajet Nasional 2019.

Presiden iya, Macky Joseph madahka sektor pelajar nerima agih belanja pemadu besai ba Bajet 2019 lalu tu ngayanka pengelurus Perintah Besai ngangkatka agi tikas pelajar ba nengeri tu.

KGS mega ku iya pechaya agih belanja nya chukup enti dibelanja memanah sereta nitihka pematut, dibelanja nitihka peminta.

“Ari RM60.2 bilion, RM652 juta diagih dikena nyeleti enggau ngintu sekula seraya RM100 juta dikena ngaga baru sekula repuk,” ku iya.

Ba Sarawak bisi 1,020 sekula repuk dikelala lalu ari penyampau nya, 414 buah dikategori kritikal.

“KGS ngarapka pengawa magi agih belanja nya deka dikena ngaga baru, nyeleti enggau ngemanahka perengka guna ba sekula repok enggau naka penyampat,” ku iya.

Bajet 2019 ti dibantai Menteri Wang Lim Guan Eng Hari Lima tu tadi mega ngagihka RM400 juta dikena ngemanah, nyeleti enggau ngintu rumah perintah nyengkaum rumah pengajar.

“Nyadi gerempung ti ngintu pengelantang bala pengajar, KGS endang nerima agih belanja tu laban bisi rumah pengajar ba Sarawak enda nitihka standard sereta repuk.

“Dikearap ari agih belanja tu, rumah pengajar ti enda nitihka standard ditetap ulih diseleti tauka digaga baru ngambika bala pengajar badu agi nangika endur sida diau lalu tau fokus ba pengawa ngajar enggau belajar,” ku iya.

Ngelansa pasal dikelaung ari mayar pupu ba pemeri ngagai belanja nyeleti infrastruktur ba sekula dibantaika Lim, ku Macky, pengawa tu chukup dipuji diperati ngelala peranak Malaysia ti nyaup pengawa nempa menua.

Taja pia ku iya nyemetak madah, pemeri nya mesti diatur nitihka prosedur operasi standard (SOP) tauka atur pengawa ti nyata ngambika sekula tau nerima pemeri nyengkaum akaun ti dikena ngagihka pemeri tauka sapa ti tau ngeluarka resit dikelaung mayar pupu ngagai orang ti meri.

“Nengah atur pengawa ti nyata, dikearap deka mayuh agi orang ngatika diri, kaban dagang tauka korporat datai nyuaka pemeri sida ngemanahka sekula,” ku iya.

Macky madahka KGS mega nerima pemutus Perintah Besai ngagihka RM10 juta dikena numbuhka 50 agi palan ngibun anak ba begunan perintah.

Kebuah pia ku iya, 70 peratus ari bala pengajar ba menua tu iya nya raban indu.

“KGS mega endang nerima manah agih belanja RM2.9 biliun dikena mantu nembiak ari raban kurang penatai pemisi, RM256 juta ngagai politeknik, kolej komuniti enggau TVET serata RM3.8 biliun ungkup scholarship enggau jali pelajar.

“Nyadi orang gawa perintah, kami ba KGS deka ngena awak tu meri terima kasih ngagai Perintah Besai ba bayar khas RM500 ti deka dibayar ujung taun tu,” ku iya. KUCHING: Gerempung Pengajar Sarawak ( STU) Bagi Menua Sri Aman udah ngatur Licha Pasal Pemaik Polisi Insurans ti disediaka gerempung pengajar nya ba sebuah hotel di Sri Aman, apin lama ke udah.

Seminar nya dikenataika Pemesai Ngatur Pengawa Gerempung, Richard Liaw lalu sama datai Sekretari Besai STU, Chung Fui San, Tukang Wang Chan Chiew Sze enggau Pemantu Pemesai Pengatur Pengawa, Chan Hian Hui.

Seraya Chairman STU Bagi Menua Sri Aman, Goh Kaw Sze, Mandal Chairman, Chin Kui Nam enggau lebih 40 iku kaban bukai udah ngulu licha nya.

Dulu ari nya, bala sida udah bejalaika kaunter servis ba tuju pengawa ti sama beserimbai enggau Program Merarau dikena ngintu Hari Pengada Confucius ti diatur Serakup Kunsil Pengatur Pengawa SJKC Bagi Menua Sri Aman Betong enggau Serakup Pengajar SJKC Bagi Menua Sri Aman Betong.

STU benung ngelakuka sekeda polisi pengerai, penusah bebadi enggau kad pengerai enggau premium baruh sereta untung ti tinggi. Pengawa tu diatur dataika ujung taun lalu diungkup ngagai bala kaban ti beumur 60 taun, enda ibuh penerang rasmi enggau beperesa pengerai.

Bala kaban diperansang ngerebut awak tu mayar ungkup diri enggau enggau sida sebilik. Pengajar ti bedau nyereta sebarang gerempung patut ngena awak tu rejista nyadi kaban STU lalu terus mayar polisi insurans iya.