Projek ti diserah ngagai JKR digaga sereta tembu manah dibanding enggau ke diserah ngagai Opis Menteri Pelajar

KUCHING: Semua projek ngaga sekula repuk nyengkaum ba Sarawak diperambu deka diserah tauka diambi Opis Kereja Raya (JKR) nengeri.

Ku, Menteri Pekara Ekonomi Datuk Seri Mohamed Azmin Ali, baka ke dipadah dalam taun 2018 bisi perambu ngemansang sepenyampau 116 buah sekula repuk di Sarawak.

Tang ku iya, projek sekula repuk ti diserah ngagai Opis Menteri Pelajar laun digaga dibanding enggau projek ti diserah ngagai JKR, ti bejalai manah sereta tembu digaga.

“Antara pekara bekaul ti disebut Kepala Menteri iya nya bekaul enggau sekula repuk.

“Aku merambu projek pemansang sekula repuk tu patut diserah ngagai JKR Nengeri, ti bisi penau dalam bidang injinir,” ku iya ba aum pengarang berita pengudah nemuai meri basa begulai enggau Abang Johari di DUN ditu, kemari.

Nitih ku Azmin, tu dikena nentuka projek sekula repuk nitihka timpuh enggau ungkus ti udah ditetap.

Iya mega nerima manah pinta perintah nengeri ke deka mantu ngemansangka sekula di Sarawak nengah pengawa numbuhka komiti begulai.

“Tu dikena ngemataka pemansang tu antara nengeri enggau perintah besai ngambika projek tu enda tejanggal lalu ulih nitihka standard ti udah ditetap,” ku iya madah nyemetak.

Kelimpah ari nya ku Azmin, perin- tah besai udah setuju deka nampung pengawa ngaga projek Jalai Besai Pan Borneo, iya nya projek ti meri pemaik ngagai rayat Sabah enggau Sarawak.

Ku iya, tu ulih ngasuh ekonomi tumbuh ngerembai sereta nyendiaka pengawa puang ungkup rayat kededua nengeri.

“Kerejasama tu beguna amat ngambika kitai ulih meda baka ni Sarawak ulih terus dikemansang nyadi nengeri ti gah,” ku iya.

Sama datai tiga iku Sapit Kepala Menteri, Datuk Amar Douglas Uggah Embas, Datuk Amar Awang Tengah Ali Hasan, Tan Sri Datuk Amar James Masing, Menteri Kereja Raya ti mega Chairman PKR Nengeri, Baru Bian enggau Kaban Kunsil Nengeri (ADUN) Krian Ali Biju.

Aku merambu projek pemansang sekula repuk tu patut diserah ngagai JKR Nengeri, ti bisi penau dalam bidang injinir. Menteri Pekara Ekonomi Datuk Seri Mohamed Azmin Ali

— Gambar Chimon Upon NEMUAI: Abang Johari (empat kiba) ngelaluka Azmin lebuh iya ke nemuai meri basa kemari. Sama bisi dipeda(ari kiba)Awang Tengah, Masing, Uggah, Baru, Ali (kanan) enggau bala pemesai kanan ari Opis Menteri Pekara Ekonomi.