Insentif ungkup anak mit ke baru ada mantu ngelempung tating apai indai
KUCHING: Insentif RM1,000 sekali ti deka diberi ngagai anak mit ke baru ada berengkah ari taun 2019, deka ngelempungka tating belanja apai indai ke deka nyengulaka anak nya ngagai renggat tinggi jemah ila.
Gerald Rentap Jabu (PBB-Layar) beterima kasih ngagai Kepala Menteri ti bejalaika inisiatif nyendiaka insentif RM1,000 sekali, ti diberi ngagai anak mit ke baru ada berengkah ari taun 2019 nya, dipeda ulih nyamin sida lebuh manggai umur 18 taun ila.
“Nengah peneleba aku, belanja ti baka nya besai amat reti dikena mantu nembiak ke deka nampung pelajar ngagai renggat tinggi.
“Apai indai sida (anak mit tu ila) enda kelalu ditating tauka ditinggalka enggau nadai pilih ti ngelakka anak sida masuk univerisiti tauka kolej.
“Lalu nyema sida milih bejalaika komersial, tu ulih nyadi modal dikena ngepunka dagang ke dipilih sida,” ku iya lebuh ti bejuraika Rang Undang-undang Bekal (2019), 2018 enggau mosyen resolusyen Anggar Pemansangu Ungkup Belanja Taun 2019.
Maya mantaika Belanja 2019 ba hari keterubah, aum ke-2 penggal ke-3 Aum Kunsil Nengeri Ke-18, Kepala Menteri Datuk Patinggi Abang Johari Tun Openg madahka perintah nengeri deka meri insentif RM1,000 sekali ngagai anak mit ke baru ada, rayat Sarawak berengkah ari taun baru.
Abang Johari madahka insentif nya diberi ngagai semua rayat Sarawak enda ngira etnik, jalai pengarap enggau status sosial , lalu duit nya semina ulih dipansutka pengudah umur manggai 18 taun sekalika dikena nampung pelajar tauka nyadi modal.
Bejaku baru, Rentap ngarapka semua rayat Sarawak lebuh manggai umur nya (18 taun)ulih nampung pelajar lalu automatik diberi dermasiswa Yayasan Sarawak, awakka ulih mantu sida ari sukut belanja.
“Ari tu bala nembiak nya ulih terus nyulut dalam pelajar. Laban sida tu mih ke nyadi aset pemadu besai ti nentuka gaya Sarawak jemah ila,” ku iya.
Berebak enggau tu, lebuh ke ngenang pasal isu ke nyadi dalam sitak ke diarika iya, Rentap ngansak Opis Menteri utiliti mantu rumah panjai baru bekaul pengawa mindahka meter karan enggau ai sida ari endur lama ngagai palan rumah panjai baru.
Kelimpah ari nya, ngemanahka transformer dikena napi peminta ke majak nambah, ku iya.
“Tu amat mar tang nyema enda dipejalaika enggau betul, nya ulih meri tating ke berat agi tauka pekara negatif bukai ke tau meri penusah,” ku iya.