SMK Luar Bandar No 1 Sibu udah ngatur ‘Majlis Anugerah Kecemerlangan 2018’

SIBU: Sekula Sekondari (SMK) Luar Bandar No 1 Sibu udah ngatur ‘Majlis Anugerah Kecemerlangan 2018’ sekula nya, kemari.

Pengerami tu dipenyadi pengari Menteri Kereja Raya (KKR) Baru Bian ti mega sekretari (sulit) menteri nya, Edwin Ipok.

Edwin maya pengerami nya madahka KKR ukai semina neruska Projek Pan Borneo tang ngemeratka projek nya digaga nitihka timpuh.

“Pia mega, KKR bela ngemeratka pengawa numbuhka pemansang jalai alun,” pia ku iya ba pengerami ti digulu bala tuai rumah, pengajar, apai indai sereta bala nembiak.

Awak tu mega dikena iya ngenataika jaku peransang ngagai apai indai nembiak ngambi ngemeranka pengawa ngembing anak sida besekula belabuh ari umur ti biak.

“Tanggungpengawa bala pengajar meri penemu nembiak endang sigi besai tang apai indai anang enda meri kerejasama ngagai sekula dikena kitai nentuka pemujur pelajar anak,” ku iya madah baru.

Ba pengerami tu dua iku nembiak, Hendry Buat enggau Rani Mat diberi Anugerah Cemerlang Kokurikulum bepun ari seduai bulih midul engkeraju ba Malaysia Beaver Computational Thinking 2018.

Kelimpah seduai, Geneve Pelaga Bundak enggau Alvyian Sonia Judo diberi Anugerah Pelajar Cemerlang Akademik enggau Anugerah Pelajar Bersahsiah Terpuji.

Sama bela datai maya tu iya nya pengari pemesai ari Opis Pelajar Pelilih Sibu John Francis enggau Prinsipal SMK Luar Bandar No1 Sibu Wong Teck Ling.

NYADIKA CHUNTO: Edwin enggau Wong begambar begulai enggau bala apai indai sereta anak sida ke bisi nerima gelar khas.

NYUKUNG: Sekeda ari bala mayuh ke bisi datai maya pengerami.

SELAMAT DATAI: Penatai Edwin disambut enggau basa.