STB udah ngemunka lambang Taun Nemuai Ke Sarawak 2019
KUCHING: Kunsil Dagang Temuai Sarawak (STB) ngelancharka lambang Taun Nemuai Ke Sarawak dikena ngepunka pengawa bejadika nya dalam bulan Januari 2019 ti diatur ba London, 6 November tu tadi.
Lambang Nemuai Ke Sarawak deka nyadi lambang besai ba Kimpin Nemuai Ke Sarawak.
Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah madahka Kimpim Nemuai Ke Sarawak dipelaba deka ngangkatka Sarawak ba kar dagang temuai nyadi siti ari palan dagang temuai ba Asia Tenggara.
“Rambai jaku ‘More to Discover’ ngelangkarka strategi STB dikena ngangkatka nengeri tu mantaika bemacham bansa budaya, pejalai matau menua, rampa menua, pemakai enggau pengerami (CANFF) ti nadai ditemu ba sebarang alai ba dunya lalu sedia ditapat.
“Taun nyin tadi, kitai nerima lebih 33,399 iku ari Britain dibida 31,274 dalam taun 2016 iya nya nambah 6.79 peratus ti nyadi lalau manah dikena matak penatai bala temuai ari makit United Kingdom (UK),” ku iya ba sebengkah penerang berita ditu, kemari.
Nyentuk Julai taun tu, Sarawak nerima penatai 19,784 iku temuai ari UK sereta ngarap ulih ngerembai 10 peratus taun tu.
Iya madahka tujuh hari Kuching begulai enggau pakej Mulu iya nya pakej ti dikerinduka bala temuai UK enggau ‘ Central Sarawak’ nyadi pematak ti majak nambah.
“Kitai deka bebendar gawa nambahka penatai bala temuai ari UK dudi hari sereta nambahka agi timpuh diau bemalam sida abis nadai 10 hari ba Sarawak,” ku iya.
“Bala temuai Britain tau nganti mayuh agi pakej baru ti deka nyendiaka rega kompetitif ti meri pemerat ngagai budaya, bejalai matau menua, rampa menua asal, pemakai enggau hari besai,” ku iya nambah.
Sarawak udah ngerikod penyampau belanja RM8.59 bilion ari dagang temuai dalam taun 2017 ti ngarika 7.9 peartus ari Pemansut Kasar Asil Dalam Menua (KDNK).
Penatai bala temuai antarabansa ngagai Sarawak ngerikot sepenyampau 2.6 juta iku taun nyin tadi.
Beberapa makit besai ungkup Nemuai Ke Sarawak iya nya UK, Jerman, Benelux, China, Australia enggau menua ASEAN.
Menua ASEAN nyadi pemansut besai pengusung ti meri 48.98 peratus tauka 2.38 juta penatai ba taun 2017.
Ketuai Pemesai Eksekutif STB ti baru dichiri, Sharzede Datu Salleh Askor madahka digital deka nyadi sebagi besai ari kimpin kitai.
“Kelimpah nempa isi penerang ba pelasar digital ungkup ngaul semak makit, kitai mega benung ngemansangka aplikasyen mindah kin kitu ti deka meransang pejalai pengawa ngiga penerang ungkup semua pengusung kitai.”
Lambang baru STB mai reti ‘Sarawak’ enggau rambai jaku ‘More to Discover’ ti ngarika juluk kimpin nya.