Projek ngemanahka agi Loji Meresi Ai Sekuau deka meri pemaik ngagai 335 pintu: Liwan

KUCHING: Bisi 335 pintu deka nerima bekal ai beresi enti projek ngemanahka agi Loji Meresi Ai Sekuau, Selangau udah tembu dipejalaika ila.

Menteri Muda Bekal ai, Datuk Liwan Lagang madahka Makmal Pengurusan Nilai bekaul Projek ngemanahka agi Loji Meresi Ai Sekuau, Selangau deka dipejalaika tengah bulan November 2018.

Iya madahka pekara nya deka dipejalaika Opis Menteri Pemansang Menua Pesisir (KPLB).

“Penyampau ke deka ngasaika servis bekal ai beresi iya nya 335 pintu, enti projek tu tembu.

“Projek tu udah dike- mendarka KPLB ari baruh RP1 sereta udah nyiri injinir konsultan ngambika bejalaika pengawa ngelangkar.

“Sida KPLB deka ngatur Makmal Pengurusan Nilai Projek ngemanahka agi Loji Meresi Ai Sekuau, Selangau tengah bulan Novemver 2018 dikena ngaluska pengasi projek tu,” ku iya lebuh nyaut tanya ari Christopher Gira Sambang (PRS-Tamin).

Ba hari ketiga Aum Ke-2 penggal Ke-3 Kunsil Nengeri Ke- 18 ba Begunan DUN kemari, Gira nanya bekaul enggau status projek ngemanahka Loji Napis Ai ba Pasar Stapang ke agi dalam renggat ngelangkar.

Lebuh ke nyaut tanya tambah ari Gira bekaul enggau kemaya peranak rumah panjai sepemanjai jalai Selangau ngagai Pasar Mit Arip deka ngasaika bekal ai beresi, Liwan madahka peminta nya udah dianjung ngagai KPLB.

Berebak enggau tu Liwan minta ADUN Tamin nya minta bantu Kaban Parlimen Selan- gau ti mega Menteri Kereja Raya, Baru Bian nentuka projek bekal ai beresi nya disediaka ba sepemanjai jalai Selangau ngagai Pasar Mit Arip.

“Aku pechaya sereta arap bendar tanya tu udah disaut peranak selangau empu lalu kitai udah nganjung peminta tu ngagai KPLB ari baruh Langgur Pemansang Malaysia Lumpar Ke- 11 ( RMK11) ngambika ulih diperundingka.

“Aku arap bendar bakih aku Kaban parlimen Selangau ti mega Menteri Kereja Raya mantu laban aku ulih meretika iya (Baru) mega dekaka peranak di Selangau ngasaika bekal ai beresi baka tu,” ku iya.