Sekeda inisiatif dipejalaika perintah dikena napi rega komoditi ti nurun: Sagah

KUCHING: Perintah nengeri nengah Menteri Betanam Betupi Moden, Tanah Adat enggau Pemansang Kandang Menua bejalaika beberapa inisiatif dikena napi rega komoditi ti nurun.

Menteri Muda Pemansang Tanah Adat Datuk Roland Sagah, madahka rega komoditi baka getah, lada chelum enggau sawit bepanggai ba pemansut enggau peminta komoditi makit dunya kelimpah besemekih enggau rega ari komoditi penganti.

Ku iya, entara inisiatif ti udah dipejalaika perintah dikena ngenanka rega jual asil bekebun nya ti nurun rega baka numbuhka ‘rega lantai’ ke alai ungkup komoditi getah perintah numbuhka Insentif Pengeluaran Getah ( IPG) kenyau ari taun 2015, dikena mantu pekebun mit getah.

Nengah inisiatif nya (IPG), nyema rega getah baruh ari rega lantai ( RM2.20/ kg), perintah nengah Opis Getah Malaysia (LGM) deka melanja bida rega nya sereta bayar bida nya ngagai pekebun.

“Bekaul enggau komoditi lada, entara chara ke dipejalai- ka Opis Lada Malaysia (LLM) iya nya ngelakuka ngena lada dalam menua baka ngambi bagi ba pengawa pemandang, ngatur program meransang makit enggau meransang pemansang tambah rega produk lada baka Garlic Pepper, Sos Lada Hitam enggau kebukai lebih agi dalam sektor bukai ke bepun ari lada.

“Tuju tu dikena ngangkat tauka nambahka peminta lada domestik nengah chara terus ke deka meri empas positif ngagai rega lada.

“Nambahka nya meransang pekebun lada ngeluarka lada bekualiti premium baka Lada Putih Krim ( LPK) enggau Lada Berkualiti Eksport (LBE) ngambika pekebun lada bulih penguntung dibandingka ngeluarka utai mata,” ku iya.

Sagah mansutka pekara nya lebuh ti nyaut tanya ari Dato Ranum Mina (UPP - Opar) ke nanya inisiatif ti dipejalaika opis menteri dikena ngetanka rega jual asil komoditi ti nurun, dikena nyeliahka pengerugi ngagai bala pekebun maya sesi tanya saut aum Kunsil Nengeri (DUN) hari ketiga ba Bangunan DUN kemari.

Nambahka nya iya madahka insiatif bukai iya nya nyual terus ngagai “niche market” dikena ngangkat pengulih besemekih industri lada Malaysia LLM, udah ngaga beberapa produk lada tambah rega renggat kilang baka Lada Steril (Mikrokleen) enggau lada injin ungkup makit ti lebih beratka pengelikun enggau kualiti pemakai enggau produk khas renggat ladang baka LPK.

“Naka ke diatu, LLM udah mujur ngerembus makit produk lada tambah rega enggau makit lada khas di Jepun, Sweden, Korea Selatan, China, Taiwan, Hong Kong, Sepanyol enggau ke bukai. Makit nya ulih mayar rega ti lebih tinggi dibandingka rega utai mata.

“Ngangkatka R&D dalam industri lada dikena ngemayuhka produk bepelasarka lada ngambika industri lada Malaysia ulih seruran besemekih enggau relevan ba makit lada antarabansa,” ku iya.

Kelimpah ari nya, bekaul enggau komoditi sawit, iya madahka Malaysian Palm Oil Board ( MPOB) udah bejalaika sekeda strategi enggau program dikena nentuka pekebun sawit nerima penatai pemisi ti patut dalam gaya ekonomi ti mar.

Entara strategi ke dipejalaika baka ‘Skim Insentif Integrasi Ternakan dengan Sawit’ enggau ‘Skim Insentif Integrasi Tanaman dengan Sawit’ ti enggau tuju nambahka penatai pemisi pekebun mit sawit.

Ngatur aum enggau nemuai terus ke menua pengimport besai minyak sawit Malaysia baka European Union enggau China.

“Ngenegapka makit eksport ke endang udah bisi sereta ngerembus makit baru ungkup produk ti ngena sawit, baka ‘niche markets’ dikena ngulihka rega makit ti lebih tinggi.

“Nitihka standard antarabansa nengah skim ‘Pensijilan Minyak Sawit Mampan Malaysia (MSPO)’ deka nyadi mandatori kena 31 Disember 2019 ti deka muka akses makit ti besai agi ba menua pengimport,” ku iya.