Perambu nyiri ketuai raban bansa ti dipilih rayat patut diperunding
KUCHING: Pakatan Harapan (PH) ngarapka perambu ti minta pengawa nyiri ketuai raban bansa di nengeri tu ti dipilih rayat lalu ukai faktor politik, ulih diperundingka perintah Sarawak.
Baru Bian ( PKRBa’Kelalan) madahka sebedau Ordinan dikemendarka, ketuai raban bansa endang seruran dipilih ulih rayat sereta ngarapka chara tu ulih terus dikemeranka.
“Kami udah meri perambu iya nya ketuai raban bansa dipilih rayat sereta udah nya dichiri perintah, lalu aku ngarapka perintah nengeri deka berundingka perambu tu, iya nya chara ti dikemeranka sebedau tu.
“Lalu baka ni bala sida Penghulu, Pemacha enggau Temenggong? Aku meri perambu ngambika Penghulu dipilih ketuai genturung pendiau, lalu Pemancha (dipilih) Penghulu sereta Temnggong (dilipih) Pemancha,” ku iya ti mega Kaban Parlimen Selangau.
Baru ti mega Menteri Kerja Raya mansutka pekara nya lebuh ti bejuraika Belanja 2019 ke dibantaika Kepala Menteri Datuk Patinggi Abang Johari Tun Openg ba hari keterubah aum ke-2 penggal ke-3 Aum Kunsil Nengeri Ke-18 ba Begunan DUN ditu, lemai kemari.
Nambahka nya, Baru madahka nyema penuduk ketuai raban bansa bepelasarka politik, sida deka nyadi kereban politik.
Iya madah, taja pan ordinan udah nyata madahka nya nadai kaul enggau politik, tang atur nya enda kala dipejalaika.
Menua diberi kuasa neritka undang-undang tang ngujungka majak jai, ku iya.
Baru ti mega Chairman PKR Sarawak madahka pengawa milih Ketuai Bansa enggau Tuai Rumah ba rumah panjai agi ngena chara lama, ke alai chalun dipilih peranak rumah panjai nya empu.
Kelimpah ari nya, lebuh ke ngenang pasal bayar elawin, Baru madahka diketu- ka sementara lalu sida deka nerima baru( elawin) taun baru.
“Elawin diketuka sementara ketegal pengawa bepilih besai bulan Mei taun tu tadi. Taun baru sepenyampau RM35 juta udah dikemendarka ungkup ketuai raban bansa di Sarawak.
“Pengawa meri elawin deka dipajakka, tang ke nyadi penanggul diatu iya nya chara nyiri,” ku iya.
Taja pia perintah nengeri ngaga pemutus deka nanggung sereta neruska pengawa mayar elawin ketuai bansa ba nengeri tu pengudah PH ngaga pemutus madamka Komiti Pengelikun enggau Pemansang Genturung Pendiau Pusat (JKKK) maya ti berengkah megai perintah besai kenyau ari bulan Mei taun tu.