Komiti konsultatif deka nentuka pekara ti disemaya dikeamat
KUCHING: Menteri Muda ba Opis Kepala Menteri (Undang-undang, Kaul perintah Nengeri-Besai enggau Matau Projek, Sharifah Hasidah Sayeed Aman Ghazali madahka komiti konsultatif ke ditumbuhka nyadika pelasar endur berunding nyema bisi sibil nyadi bekaul hak sereta kuasa dalam Sempekat Malaysia 1963 (MA63).
Iya madahka perintah nengeri nengah komiti ke ditumbuh deka nentuka pekara ke disemaya dikeamatka.
“Kitai enggau naka nentuka nama ke disemaya ulih dikeamatka, nyema bisi sibil nyadi kitai deka duduk berunding nama atur nangkanka nya deka dipejalaika laban kitai bisi Komiti Konsultatif.
“Tang patut dikeingatka semua pengawa berunding nya dipejalaika dalam konteks sebuah menua Malaysia,” ku iya lebuh ti nyaut tanya tambah ari Dato Murshid Diraja Dr Juanda Jaya (PBBJamoreng).
Hasidah mansutka pekara nya lebuh nyaut tanya ari Dr Juanda enggau Johnichal Rayong Ngipa (UPP-Engkilili) bekaul enggau chara perintah nengeri nentuka hak rayat Sarawak dalam MA63 ke majak lenyau ulih diambi pulai baru, maya sesi tanya saut Hari Ketiga , Aum Ke-2 Penggal Ke-3 Kunsil Nengeri (DUN) Ke-18 ba Begunan DUN ditu, kemari.
Berebak enggau tu, Hasidah madahka maya perintah nengeri berandau enggau perintah besai sebedau, tu mayuh pekara ke dikerandau sereta dikemujurka.
Nitih ku iya, pengawa berandau enggau perintah besai sebedau tu dipejalaika dalam dua renggat, keterubah berandauka mulaika kuasa ba atur bejalaika pengawa enggau renggat kedua ti benung dipejalaika diatu iya nya mulaika kuasa enggau hak konstitusyen baka minyak enggau gis enggau ke bukai.
“Perintah nengeri sebedau tu udah baum enggau perintah besai ke sebedau tu dikena nentuka hak Sarawak dipulaika baru, lalu asil ari aum nya beberapa pekara udah dipesetuju.
“Bekaul enggau mulaika kuasa ba atur bejalaika pengawa (enggau perintah besai ke sebedau tu) bisi 13 pekara udah dipesetuju dipulaika baru ngagai Sarawak baka penyampau pengajar ti asal tauka anak Sarawak ditikika ngagai 90 peratus ba taun 2018, semua projek ke dipejalaika di nengeri tu patut ditanya dulu ngagai Sarawak enggau ke bukai,” ku iya.