Pemujur PH nyadi perintah meri awak mai pemansang ke Sarawak

SIBU: Pemujur Pakatan Harapan (PH) nyadi perintah maya Pengawa Bepilih Besai (PRU) suba nyadi awak ke engkeman dikena mai nengeri Sarawak mansang ngambika sebaka tikas enggau Semenanjung.

Sapit Menteri Besai Datuk Seri Dr Wan Azizah Wan Ismail madah, taja Sarawak udah lama dipegai parti ke nyadi perintah dulu ari tu tang nengeri tu mengkang enda mansang.

“Tebal agi rayat ditu lebih agi ba menua pesisir empai datai pemansang infrastruktur.

“Ketegal nya, perintah PH deka ransing mai nengeri Sarawak mansang baka Semenanjung.

“Tu semaya kami. Kami deka mai ubah sereta pengelurus ba semua rayat,” pia ku iya maya bejaku ba pengerami makai lemai begulai enggau rayat ba RH Hotel ditu, lemai ensana.

Penatai iya tu keterubah iya diatur kenyau ke udah dipilih nyadi Sapit Kepala Menteri.

Sama bela datai maya tu iya nya Sapit Menteri Ba Opis Menteri Besai Fuziah Salleh, Kaban Parlimen (MP) Julau Larry Sng, MP Miri Dr Michael Teo, MP Johor Bahru Akmal Nasrullah Mohd Nasir enggau MP Lubok Antu Jugah Muyang.

Dr Wan Azizah ti mega Menteri Pemansang Orang Indu, Ruang Bilik enggau Mensia Mayuh madahka nengeri tu nengeri ti besai sereta ngembuan pengaya ba macham bengkah pengeraja asal ti ulih dikereja dikena ngaduka pemansang ke man- ah agi.

Ku iya, pekara nya beguna dikena nyaup perintah ngemansangka nengeri tu enggau chara numbuhka infrastruktur ti silik baka jalai alun, ai enggau karan.

Kelimpah ari nya, iya mega madahka opis menteri iya deka bekerejasama enggau pemesai ba Opis Menteri Besai mutarka penanggul ke bisi nyadi ba pekara meri bantu ngagai nengeri tu.

Berebak enggau tu mega, Dr Wan Azizah ngelalau raban parti ti menang ba pengawa bepilih parti nya ila mengkang nanggam kerejasama ba tuju ngeringka agi parti sida.

“Pia mega, kerejasama tu endang meseti bisi kelimpah kitai semampai ngira sida ke udah lama ngering sereta mai parti nyentuk datai ba tikas tu,” ku iya madah baru.