Opis Kampung Sarawak nerima RM15 juta dikena ngemansangka ‘Santuari Buaya’ di Samariang
SIBU: Perintah nengeri udah ngagihka RM15 juta ngagai Opis Kampung Sarawak dikena ngemansangka ‘Santuari Buaya’ di kandang menua kampung paya, Samariang Kuching.
Penulung Direktor Kampung Kanan (Unit Taman Negara enggau Jelu Siga) Sarawak Azahari Omar madah, nyema udah tembu ila tu deka nyadi palan ti keterubah di nengeri tu.
Ku iya, Opis Kereja Raya udah nyiri raban penyanding penemu dikena nyediaka pelin infrastruktur enggau tinda projek tu nyangka deka dibuka ba taun nyin ila (2019).
“Santuari tu deka nyadi siti ari palan ke ulih narit temuai datai ke Kuching.
“Kelimpah ari nya, pemansang santuari nya tu endang dikemerat ungkup pengawa belajar, konservasyen enggau pansik bekaul baya,” ku iya madah ngagai pengarang berita kemari.
Dulu agi ari nya, iya udah ngulu ‘ Program Tentang Pengurusan Mampan Buaya’ di Sarawak ke digaga di sebuah hotel ditu.
Pengerami bejadi program nya udah dipenyadi Pemesai Pelilih Sibu Awang Yusup Awang Mostapha.
Ku Azahari, santuari tauka palan ngintu tu deka nyadi palan baru dikena ngengkahka baya ti udah ulih ditangkap lalu dipindahka ari kandang endur enda tau bisi baya.
Ku iya, Opis Kampung Sarawak mega sama udah ngelangkar deka ngaga santuari baya di kandang menua bukai nyengkaum di Miri enggau mega Lawas.
Taja pia, pejalai projek nya nitihka agih belanja ti diberi ngagai sida.
Beserimbai enggau nya, bisi 193 iku pesereta ari baka ketuai komuniti di bagi menua tu datai ngulu program nya.
Batang tuju ngatur program tu iya nya dikena meri mayuh agi penemu ngagai komuniti bekaul status baya ari sukut undang-undang enggau ekologi (chara idup) baya.
Ku iya, pekara tu patut diperati enggau bebendar ngambika konflik entara kitai mensia (kelebih agi sida ti suah bekenaka sungai) enggau baya ulih dikurangka.