KM deka minta Menteri bekaul nyendia implikasyen belanja, urung RM30 juta dikena ngemujur perambu

Utusan Borneo (Sarawak) - - Berita Iban - Dikarang Chris Bishop

KUCHING: Kepala Menteri (KM) Datuk Patinggi Abang Johari Tun Openg madah Sarawak deka ngaga ubah ba sentang pekara pelajar nembiak pra-sekula.

Tajapan pekara pelajar nyadi tanggungpengawa Perintah Besai, iya madah pra-sekula enda disengkaum dalam korikulum pelajar menua.

“Ketegal nya aku deka ngaga ubah, pra-sekula enda disengkaum dalam korikulum pelajar menua alai kitai deka ngaga atur pra-sekula baka atur ke digaga kitai (Sarawak) ba bengkah pelajar tinggi ditu,” ku iya.

Abang Johari mansutka jaku nya ba pengerami Anugerah ‘ Khas’ Kepala Menteri Sarawak ke-26 di Begunan Dewan Undangan Nengeri (DUN) ditu, malam ensanus.

Iya nambah pekara wang ukai nyadika penanggul ungkup Sarawak ngemujur pekara pelajar pra-sekula.

Ku iya, aku deka minta Datuk Fatimah ( Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit) nyendia impli- kasyen belanja, engka urung RM20 juta nyentuk ngagai RM30 juta chukup.

Ngenang sentang pendiau pra-sekula tauka tadika di Sarawak, Abang Johari madah pekara nya balat ngirau kelebih agi tadika di menua pesisir.

“Kitai bisi tadika tang pendiau tadika kitai tu baka ke mati pan enggai.

“Di kandang menua pesisir kitai bepanggai enggau tadika Kemas, tang Kemas tu udah dikemanah lalu ketegal nya pekara ke bekait enggau pelajar tumu tu udah nadai,” ku iya.

Manding tadika peribit di kandang mengeri, iya madah nembiak ke belajar diak manah alai sida nemu mayuh bengkah jaku sereta meretika pelajar.

Enti pekara tu nyadi ku iya nambah, deka bisi bida entara orang kaya enggau orang umang ketegal sida ke kaya ulih nganjung anak sida belajar di tadika pribit.

Anugerah ‘Khas’ Kepala Menteri Sarawak diatur Yayasan Sarawak lalu serak tu nyendia perais manggai RM93,000 ti deka nyadi insentif ngagai penerima ba 19 kategori.

Bela datai bini Abang Johari, Datin Patinggi Datuk Amar Juma’ani Tuanku Bujang, Speaker DUN Datuk Amar Mohamad Asfia Awang Nassar, Menteri Dagang Entarabangsa enggau E-Dagang Dato Sri Wong Soon Koh, Menteri Kaunsil Kandang Menua enggau Berumah Datuk Dr Sim Kui Huan enggau Direktor Yayasan Sarawak Azmi Bujang.

Ketegal nya aku deka ngaga ubah, pra-sekula enda disengkaum dalam korikulum pelajar menua alai kitai deka ngaga atur pra-sekula baka atur ke digaga kitai (Sarawak) ba bengkah pelajar tinggi ditu. Datuk Patinggi Abang Johari Tun Openg Kepala Menteri Sarawak

Newspapers in Malay

Newspapers from Malaysia

© PressReader. All rights reserved.