Pengawa bepilih PKR sitak Kapit enggau Hulu Rajang mujur
KAPIT: Bala kaban Parti Keadilan Rakyat (PKR) sitak Parlimen Kapit enggau Hulu Rajang udah bejalaika tanggungpengawa ngundi milih ketuai sida enggau mujur kena pagi Hari Enam tu tadi.
Sitak Kapit ngembuan urung 600 iku kaban seraya Hulu Rajang 1,734 iku.
Keterubah iya ba menua tu bala kaban PKR ngasaika ngundi nengah chara ‘online’ lalu tebal agi sida enda nemu sereta saru.
Raban parti udah nganjung sekeda pengereja pengawa ari Kuala Lumpur datai kitu matau pengawa bepilih lalu mantu sida ketuai ti enda entu nemu seling pengawa ti patut dikereja.
Ba Kapit, Sng Chee Eng (Jalong) ti bediri minta pilih nyadi chairman pampang udah bepadan enggau Jessie Jimbun.
Bisi 50 peratus ari semua penyampau kaban rejista ti patut ngundi ba sitak Kapit. Palan ngundi udah ditetap ba bilik konferen Serakup Chiang Chuan Kapit, Jalai Pemancha Law Chen Eng ba Pasar Baru.
Sitak Hulu Rajang, bisi dua palan ngundi, bala kaban ba Baleh ngundi ba Hotel Meligai seraya sida ari Belaga dipinta ngundi ba Skim Pengentap Baru Pendiau Sungai Asap/Koyan.
Ari pemerati ari luar, madahka bala kaban mayuh agi nguing ngagai chalun lumur 1, Rafizi Ramli diangkat nyadi Sapit Presiden Nasional sida.
Sitak Hulu Rajang, dekaka chalun lumur 2 Mohamad Azmin Ali.
Nentuka atur pejalai bepilih parti lanchar, raban polis enggau bala pemesai Pampang Khas (SB) dikerah gawa matau endur bepilih.
Pekara ti matak perati iya nya sida Sng sebilik diketuaika Dato’ Sng Chee Hua ba Wilayah Tengah Sarawak. Dato Sng bediri minta pilih nyadi chairman ba Sarikei, MP Julau, Sng Wei Shien bediri ba Julau, siku agi anak lelaki Dato Sng, Sng Wei Hiong bediri ba Sibu lalu Kapit diarika Sng Chee Eng, menyadi lelaki Dato.