Tim Seri Buana mujur nyadi champion Pekit Bedindang SK Selanjan

SRI AMAN: Tim Seri Buana udah menggi gelar champion ba Pekit Bedindang ti diatur ba Sekula Primari (SK) Selanjan, ditu kemari.

Tim Seri Buana tu udah mai pulai mata duit RM300 enggau trofi, lalu ba penuduk lumur dua udah diempu Tim Selanjan Angkung sereta lumur tiga diempu tim Kuat Team Tu. Kededua tim tu udah mai pulai mata duit RM250 enggau trofi sereta RM150 enggau trofi.

Pekit bedindang tu iya nya ti kedua udah diatur sekula tu ti betuaika kepala pengajar SK Selanjan Jame Baya ti mega nyadi chairman pengatur pekit tu.

Batang tuju ngatur pekit tu iya nya dikena ngetan sereta ngelakuka main asal kitai Iban ti majak lenyau diserunyut jeman.

Pia mega tu nyadika pelasar dikena komuniti di kandang menua tu ngerapitka kaul enggau pangan diri sereta nerenakka pengandal nembiak di sekula tu ngambika angkun ke main asal ti jarang diayanka kemaya hari,” pia ku Jame bejaku lebuh meri jaku pengelalu iya ba pengerami nya ti diatur bepalan ba Balai Mayuh Guna SK Selanjan, kemari.

Keplimpah ari nya, Jame mega meransang nembiak rebak baru ngambika sama nyereta pekit bansa nya dikena mantaika pengelandik ti dikembuan sereta bekunsika penemu ngambika bisi nyadika chuan rebak dudi bekaul enggau main asal bansa Dayak.

Berindik ari pekit tu ti dibuka ungkup bala mayuh di kandang menua tu, kami mega ngarapka pekit tu nyadika pelasar endur bekunsi penemu sereta meda penyulut nembiak rebak baru mandangka pengelandik sida ti engkeman ba main asal ngambika ulih besemekih enggau main bukai ba dunya moden kemaya hari tu,” ku ya nandu.

Kaban Kunsil Nengeri ( ADUN) Bukit Begunan Mong Dagang udah dipebasa bejadika pekit tu ngelalau raban kelebih agi sida ti ngaul diri dalam Gerempung Apai Indai enggau Pengajar (PIBG) ngambika chakah agi ngatur program tauka pekit ti bansa tu ke nyadi pelasar endur bekunsika penemu bekaul main asal ti majak lenyau diserunyut jeman.

Pekit main asal bansa tu endang engkeman diatur kemaya hari ngambika sama dipekunsi enggau bala nembiak rebak baru.

Ari pengawa ti bansa tu kitai udah mantaika ngagai sida ( nembiak) main asal lama ti dikembuan kitai bansa ngambika terus dikemeran kelai pengeransing kitai enggaika main asal bansa tu lenyau jemah ila. Kelimpah ari ngatur pekit bansa tu, kita mega ulih ngatur pekit baka batak lampung, main pangka ( gasing) sereta ke bukai dikena nentuka main asal tu seruran dikemeran sereta dikeingat nyentuk ke jemah ila,” pia ku Mong bejaku maya pengerami nya kemari.

Kelimpah ari bepekit nya, temuai ti datai mega bisi diperindang enggau rikoding artis Linda Simai ti endang dikelala enggau lagu ‘Asai Ati Enggai Beserara’ enggau ‘Dirantai Pengerindu’.

Sama bisi datai ba pengerami tu iya nya Kunsilor Menjang Niah, Kunsilor Tr Noria Ampat, Kunsilor Tr Tiam, sapit chairman PIBG SK Selanjan Low Inja, bala ketuai komuniti, sereta bala bukai ke bisi datai.

TERIMA KASIH: Pekit Bedindang SK Selanjan ti kedua kali udah diatur narit mayuh penyereta lalu dikearap pekit tu agi diatur ba taun ti deka datai.

TABA PROJEK: Danald (kanan) enggau Dr Ngenang bejadika pengawa nasih tanah seraya dikemata bala bukai.

RAMI: Enda richah nyema bedindang tang nadai disempulang enggau sida ti betanda ngulu sereta ngerami pengawa nya.

BEDINDANG: Tim Ngeruh Ai ti udah sama enggau ngerichahka pengerami Pekit Bedindang SK Selanjan kemari.

SELAMAT DATAI: Datuk Mong disambut enggau main asal sereta ngepan asal bansa Iban.

PANGGAU PEMERINDANG: Temuai ti udah datai meda pengerami tu mega diperindang enggau penyanyi Iban, Linda Simai.