Gerija St Alban di Sarikei deka nambahka dua begunan baru enda jauh ari gerija

SARIKEI: Gerija Anglikan St. Alban ba Susur Jambu ditu deka nangkir dua struktur begunan sida enda lama agi.

Pada garija, Rev. Father Rentap Nuang madahka perambu projek iya nya Rumah Paderi enggau Balai Gerija ti dientak ba tanah 1812 kaki pemesai sepiak gerija.

Ketegal penekul ba belanja, sida deka berengkah ngaga Rumah Pada ti ditimpuh sida tembu kandang 36 bulan, ku iya, seraya nambah, udah nya baru sida bejalaika projek Balai Parish.

Taja pia, iya nadai madah nyemetak berapa penyampau belanja udah digiga enggau penyampau ungkus projek diperambu nya.

Pengawa tu begunaka kelebih agi bala Komiti Kaunsil Parish (PCC) gerija chakah agi ngepunka aktiviti ngiga belanja, ku iya lebuh pengawa merekat enggau nasih tanah ba taba ungkup projek diperambu kena lemai Hari Lima tu tadi.

Taja projek diperambu baru berengkah digaga, iya andal amat, ari pengawa dipejalai raban PCC, ari sampi sida deka ngasuh projek tu nyadi nyata, ku Father Rentap.

Pengudah pengawa merekat taba tembu, Bishop ari Gerija Anglikan ba Sarawak enggau Brunei Darul Salam, Reverend Danald Jute udah nyempulang Direktor Unit Pekara Pengarap Bukai (Unifor) Datu Dr. Ngenang Jangu, Ketuai Rejista Kort Bumiputera Sarawak, Datu Michael Dawi enggau Rev. Father Rentap bejadika pengawa nasih tanah.

Bishop Danald enggau Father Rentap meri tabi puji ngagai Dr. Ngenang enggau Michael Dawi ti udah gerah jari besaup ngasuh projek nya nyadi nyata.

Sida mega meri terima kasih ngagai Perintah Nengeri ti udah nyendiaka taba enggau bantu belanja.