Pekara dagang mesti ditegap nempa graduet ti landik gawa

Utusan Borneo (Sarawak) - - Berita Iban -

MIRI: Pengawa ngenegapka pekara dagang nengah bemacham aktiviti enggau program ti dilangkar diperati seriris enggau juluk nempa graduet universiti ti tau ‘ngaga kereja’ ari semina ‘ngiga kereja’ aja.

Sapit Mandal Chanselor ( Pekara Nembiak enggau Alumni) Universiti Malaysia Sarawak (UNIMAS) Profesor Datu Mohd Fadzil Abd Rahman madah tuju inisiatif dipejalai Opis Perintah Pelajar Tinggi sebedau tu dikena mutarka isu nadai kereja ngagai raban graduet.

“Nengah pengawa tu ti dipejalai ba semua Universiti Perintah (UA) ulih nerenakka semengat ba genap iku nembiak universiti enda bepanggai ngagai kereja makai gaji aja.

“Bala nembiak patut berani napi pemar enggau ngubah ‘penetap runding’ ke alai gaya kereja nya belalauka makai gaji aja, tang nempa pengawa puang antara awak enggau jalai ti tau dirandang ngambika nyadi orang ti mujur ba batang pengawa,” ku iya.

Iya mansutka jaku nya lebuh dirandau Utusan Borneo ngelansa ripot surat berita besai pasal Laporan Tinjauan Ekonomi Kementerian Kewangan 2019 bekaul enggau penyampau tubuh nadai kereja raban graduet bumiputera pemadu tinggi pun minggu tu tadi.

Kenu ku iya, pekara graduet milih kereja ukai siti pekara baru laban kenyau ari suba nyadika pugu penanggul nadai kereja.

“Ulah enggai pansut ari zon lantang mindah ari menua asal bala nembiak nyadi pugu besai isu tu.

“Pengingin deka gawa perintah atas ari semua kereja peribit antara penerang ti diulih ari pengawa matau enggau asil ari randau enggau raban nembiak ti benung ngiga kereja,” ku iya.

Mohd Fadzil madahka universiti baru ti betambah enggau pengawa numbuhka pampang universiti menua luar ba Malaysia majak mayuh ninting taun nyangka deka nambahka agi penyampau tubuh graduet nadai kereja enggau pengawa puang enda ulih tetangkupka penyampau graduet, reti jaku bukai, ‘supply over demand’.

“Berindik ari dunya jam- pat mansang, pelajar tinggi majak dinamik, tentu mar amat nentuka genap iku ari graduet universiti dijamin enggau kereja kelebih agi makai gaji.

“Pekara nadai kereja atas ari semua dalih bukai ti diberi, ke amat, semua tu ulih diputar ari gaya ulah sida empu.

“Semina siti genteran jaku aja ulih dikesema ba pekara tu, bepanggai amat ba ‘survival of the fittest’. Semina sida ti puh enggau liat ati aja deka ulih mutarka pengurang sereta pengeransing gawa,” ku iya.

Newspapers in Malay

Newspapers from Malaysia

© PressReader. All rights reserved.