Tugu Pengingat Pendam Munggu Sabun dikena masa bansa Dayak ti dikubur dia

Utusan Borneo (Sarawak) - - Berita Iban -

KUCHING: Siti Tugu Pengingat deka digaga di Pendam Munggu Sabun di Jalai Pending ditu berengkah 17 November 2018.

Nitihka penerang Chairman SADIA pampang Kuching, Dato Paduka Dr Anthony Nait, tugu nya dikena ngingat sereta masa beratus bansa Dayak kelebih agi Iban ke udah dikubur dipendam nya.

“Ba tugu nya ila, deka ditulis rintai nama sida ke dikubur di Pendam Munggu Sabun.

“Sida tu dikubur maya jeman perintah Brooke sereta ba jeman perintah British kelia.

“Pengawa ngaga Tugu Pengingat nya disadang tembu dalam timpuh dua bulan,” ku iya.

Anthony ke mega Chairman Pengatur Pengawa nya nambah, pengawa nya ila besai lalu deka dikemujur nengah adat Iban.

Ku iya, pengawa miring bebunuhka jani deka diuluka Lemambang Nicol Ragai Lang lalu berengkah jam 8 pagi.

Nitihka penerang Anthony, Temenggung Iban Pelilih Kuching Datuk Bernard Aggan deka datai lalu bejadi pengawa maya nya ila.

Ketuai Majlis Adat Istiadat Datu Ganie Ugay disadang datai mega.

Iya madah urung 100 bala tuai rumah, pengulu enggau pemancha ngelingi Pelilih Kuching bisi dikangau ngulu pengawa.

Kelimpah ari nya, Anthony mega madah projek gutung ruyung nebas pendam nya deka mega diatur maya nya ila alai iya minta semua mai duku.

Berindik enggau nya, iya ngelalau semua ke diau besemak Kuching sama bela sampal datai ngemata lalu ngemujur program.

Newspapers in Malay

Newspapers from Malaysia

© PressReader. All rights reserved.