KGBS muji perintah Sarawak bebendar nentuka penanggul sekula repuk diputar enggau chara manah
KUCHING: Kesatuan Guru Bumiputera Sarawak ( KGBS) muji perintah Sarawak ti sanggup sereta naka ulih ngena belanja simpan nengeri dikena nentuka penanggul sekula ti udah lama sereta repuk ulih diputarka ngena chara manah.
Presiden iya, Ahmad Malie meri puji ngagai perintah Sarawak ti bejalaika inisiatif ngagihka RM81.7 juta dalam Bajet 2019 ti dibantaika Kepala Menteri Datuk Patinggi Abang Johari Tun Openg, ti mega Menteri Wang.
“Enggau agih belanja nya nunjukka iya nya perintah nengeri Sarawak sanggup sereta naka ulih ngena belanja simpan nengeri dikena nentuka penanggul sekula tuai sereta repuk ulih diputarka ngena chara ti engkeman,” ku iya madah ngagai Utusan Borneo.
Ahmad meri penerang nya lebuh ti ngenang agih belanja 2019 perintah nengeri bekaul enggau belanja ti diungkupka ngagai pekara pelajar ba nengeri tu lebih agi pasal sekula ti udah jai sereta repuk ke patut digaga sereta dikemanahka baru.
Bejaku baru iya madahka eng-
Ahmad Malie Presiden KGBS
gau komitmen tinggi ari perintah nengeri, KGBS ngarapka agih belanja RM100 juta ke dipadahka dalam Bajet 2019 perintah besai apin lama, Sarawak deka bulih agih ti besai.
“Kitai ngarapka Sarawak deka bulih agih belanja enggau penyampau ti besai laban penyampau sekula jai agi mayuh di Sarawak.
“KGBS ngarapka perintah besai nengah Opis Menteri Pelajar (KPM) ulih berundingka peminta KGBS tu dikena nunjukka iya nya pelajar tanggungpengawa perintah besai,” ku iya.
Kelimpah ari nya KGBS amat nyukung kerejasama perintah nengeri enggau besai ba pengawa ngangkatka pemanah kereban enggau penyulut pelajar ti sebela enggau nadai ngira dini endur sekula.
“KGBS meda kededua agih bajet ari perintah nengeri enggau perintah besai nyadi gempung belanja ti tegap dikena mutarka penanggul sekula tuai sereta repuk di Sarawak,” ku iya.