Patut bisi sekula primari di Apau Nyaring dikena meransang nembiak besekula

Utusan Borneo (Sarawak) - - Berita Iban -

KUCHING: Kaban Kunsil Nengeri ( ADUN) Telang Usan Dennis Ngau ngapil ngagai Opis Menteri Pelajar ba renggat Perintah Besai enggau Perintah Nengeri ngambika ngaga sekula primari ba Apau Nyaring, Ulu Tinjar dikena meransang mayuh agi bala nembiak menua pesisir besekula.

Nitih ku Dennis, Perintah Nengeri udah ngaga Palan Servis Menua Pesisir ( RSC) Penan ba Apau Nyaring tiga taun ke udah ti nyendiaka palan aktiviti ungkup komuniti dia.

Tang sinu amat, mayuh nembiak ti umur benung sekula nadai besekula ketegal jauh lalu napi pemar nurun ngagai sekula pemadu semak, ngelawa Long Aton, ku iya.

“Sinu amat aku meda pekara tu laban aku ulih meda nyata kini kuing pengidup sida dudi hari, napi pemar tauka tusah agi ari diasaika apai indai sida diatu enti enda besekula enggau nerima pelajar.

“Nya kebuah aku ngansak Opis Menteri Pelajar Malaysia enggau Sarawak patut beratika pematut sekula primari digaga din,” ku Dennis lebuh mansutka batang jurai bajet ba Aum Kunsil Nengeri ( ADUN) Hari Lima tu tadi.

Dennis madahka diri lantang ati deka madahka Gerija Roman Katolik udah bejalaika inisiatif nyendiaka pelajar Tadika ungkup bala nembiak mit ba Apau Nyaring, taja iya pechaya tu semina pengawa enda lama aja.

“Pia mega beguna amat ngaga klinik desa dia ngambika peranak menua pesisir ulih nerima servis ti patut. Dikena nentuka pengerai peranak menua pesisir meruan diintu, kitai meseti nambahka penyampau klinik desa laban tu raban ti dulu mutarka semua isu bekaul enggau pengerai.

“Ba pekara bukai, aku deka ngansak perintah berunding ngaga klinik desa ba Long Aton, Ulu Tinjar enggau Long Luteng, Sg Patah,” ku iya nambah.

Ba jaku dipansutka iya, Dennis mega madahka diri asal sentang pelin nutup Klinik 1Malaysia ba Long Lama ti dipejalaika Perintah Besai.

Nangkan nya, iya mega meri terima kasih ngagai ADUN Pujut, Dr Ting Tiong Choon ti udah beratika klinik tu tang salah amat nyukung pengawa salah Perintah Pakatan Harapan ( PH) ti nutup klinik nya.

“Iya ( Dr Ting) udah kiruh beratika pekara pemayuh tubuh pesakit nerima perubat ba klinik nya ninting hari lalu August House berapa penyampau belanja dikena ba klinik nya. Aku sedar amat ba pekara tu.

“Nyangka ari sukut penemu dagang klinik peribit, mayuh agi pesakit nganjung diri berubat kia deka manah agi. Tang ba aku, nyadi pengari rayat, mimit agi tauka nadai pesakit berubat ba klinik tauka sepital, manah agi laban tu ngayanka rayat bepengerai. Ba kes Klinik 1Malaysia Long Lama, kitai enda ulih nyebut semina ketegal tiga iku aja sehari pesakit berubat ba klinik nya ti ngasuh klinik nya meseti ditutup,” ku iya.

Dennis madah lebuh bala komuniti Long Lama enggau iya empu minta Klinik 1Malaysia digaga ba Pasar Long Lama, tu ukai semina ketegal pemar ngulihka Klinik Long Lama baru ba seberai pasar.

“Kena mungkal, aku melabaka semina tu aja klinik digaga perintah BN ba mua sekula sekondari enggau 800 iku nembiak ti datai ari pengentap pendiau menua ulu ari selampur Ulu Baram.

“Aku chukup sedarka bala nembiak mit tu datai ari ruang bilik nadai enda chukup pemakai sereta jampat tabin. Ari pemisi klinik besemak, tu deka mantu sida enggau ngajar sereta nyukung bala staf ba kes ngenyit,” ku iya.

“Kitai ransing gawa ngemanahka semua penyikap perengka guna ba Pasar Long Lama lalu ari nya, kitai ngadang penyampau tubuh peranak deka nambah, nya kebuah kitai begunaka semua ejensi perintah bisi ditu,” ku iya nambah.

Newspapers in Malay

Newspapers from Malaysia

© PressReader. All rights reserved.