Tu beguna amat ngambika raban nembiak rebak baru ulih nampung pengawa ke udah digaga bala ketuai ke diatu
MIRI: Serakup nembiak beguna amat nyadika pelasar dikena ngenegap enggau nyikap rebak biak nampung pengawa ditegika bala ketuai ungkup dudi hari.
Sapit Speaker Aum Kunsil Nengeri ( DUN) ti nyadi Kaban Kunsil Nengeri (ADUN) Mulu, Datuk Gerawat Gala madah, penyulut menua dudi hari bepanggai ba raban nembiak ti menyana kemaya hari.
Ku Gerawat, nyadi ketuai ari rebak tuai, perintah endang ngelanggur deka nyerahka kuasa ngagai rebak nembiak, tang ba jam ti patut.
“Enti kelalu laun, raban nembiak endang deka asa laban ngasaika pangku pengawa sida enda diguna ba komuniti. Tang enti kuasa diserah kelalu tumu, nyangka sida bedau sedia.”
“Pengawa nyerahka kuasa tetap datai lalu tanggungpengawa enggau penau nampung pengawa nyadi ketuai patut disikap diatu. Nya kebuah raban nembiak patut nyikap diri ngesan tanggungpengawa tu,” ku iya lebuh bejaku ba Pengerami Makai Lemai Gala diatur Serakup Lun Bawang Sarawak (PBLS) Pampang Nembiak ba sebuah hotel malam kemari.
Ba pekara tu ku Gerawat ti mega penyanding penemu Gerempung Serakup Orang Ulu Sarawak Malaysia (FORUM) temegah ati laban raban nembiak Lun Bawang mujur nganyanka diri ulih ngesan tanggungpengawa lalu nunjuka diri ulih nyadi ketuai ti nyulut nengah aktiviti ti dipejalai.
“Aku beratika Pampang Nembiak Lun Bawang udah nyata ngayanka diri ulih bejalaika pangku pengawa besai ba komuniti. Aku ngarapka raban nembiak ari serakup bukai di baruh pegai FORUM nunda sida ngatur enggau bejalaika aktiviti.
“Ambika chunto, pemujur ba atur pengerami makai lemi gala, Festival Irau Aco Lun Bawang ba Lawas kelimpah ngatur mayuh aktiviti sepanjai taun. Aku ngarapka pengeran sida tu gawa diteladan sereta ditampung,” ku iya.
Gerawat mega merambu pampang nembiak ngambi ngemayuhka agi aktiviti ti ngaul rat tanggam kaul raban nembiak kelebih agi ba kandang mengeri kelimpah ngetanka semengat begulai bebaik dalam komuniti.
Ku iya, rebak nembiak kemaya hari tau ngatur randau enggau ngelangkar program begulai seriris enggau pengerembai dunya diatu taja pekara tu mar dikereja laban bela diau jauh ari pangan diri ba mengeri.
Iya mega meri tabi puji ngagai 15 iku penerima Anugerah Belia 2018 ti ngaku pemujur enggau penyulut dijapai raban nembiak Lun Bawang ba mayuh bengkah pengawa.
“Aku ngarapka tanda basa tu ulih meri peransang enggau semengat ngagai raban nembiak Lun Bawang seruran gawaka pemujur ba sebarang pengawa ti dikaul sida,” ku iya.
Kelai sukung ba pengawa raban nembiak Lun Bawang enggau ngintu pengelantang bala kaban sida, Gerawat mega ngemendarka agih belanja sepenyampau RM10,000 ungkup taun baru.
Sama datai Presiden Serakup Lun Bawang Sarawak Ipoi Datan enggau Chairman PLBS Pampang Nembiak, Petrus Lasong sereta exKaban Parlimen (MP) Bukit Mas Datuk Mutang Tagal.
Pengawa nyerahka kuasa tetap datai lalu tanggungpengawa enggau penau nampung pengawa nyadi ketuai patut disikap diatu. Nya kebuah raban nembiak patut nyikap diri ngesan tanggungpengawa tu. Datuk Gerawat Gala Sapit Speaker DUN Sarawak