Penyampau kes denggi ti nabanka nyawa di Sarawak kusut 75 peratus

SIBU: Penyampau kes denggi nengeri tu nurun 31.6 peratus enggau penyampau kes ti nabanka nyawa bela kusut 75 peratus dalam kandang 1 Januari nyentuk 3 November 2019 ba timpuh ke sebaka taun 2017.

Sekretari Perintah Besai Sarawak, Dato Mansor Man madah, penyampau nya mungkur 586 kes denggi enggau siti kes nabanka nyawa enti dibida enggau 856 kes sereta empat kes nabanka nyawa taun siti tadi.

“Penyampau kes nitihka sitak iya nya (133 kes) ditangkan Sibu (88 kes), Samarahan (69 kes), Betong (59 kes), Kapit ( 50 kes), Miri ( 41 kes), Serian (39 kes), Sarikei (38 kes), Sri Aman (33 kes), Bintulu (15 kes), Limbang (12 kes) enggau Mukah (9 kes),” pia ku iya madah ngagai pengarang berita.

Dulu agi ari tu iya bejadi Gotong-Royong Mega Siri 2.0 Perangi Aedes Peringkat Negeri Sarawak 2018 di Palan Komersil Farley, Jalai Salim, ditu, kemari.

Mansor madah, penyampau tu kusut ari kerejasama sereta pemereti mensia mayuh bekaul enggau pengawa ngemunaska kes denggi kelimpah media bela meri kerejasama.

Taja pan baka nya, iya ngarapka mensia mayuh ngambika enda terunda enggau penyampau nya tang chakah agi bela ngemunaska penyakit denggi.

“Opis Pengerai Nengeri (JKN) Sarawak mengkang ngerikod kes tu nambah ari tengan taun nyentuk 3 November,” ku iya madah baru.

Maya bejaku bejadika program sehari nya, Mansor madahka pengawa ngemunaska denggi randaka kerejasama ari semua.

“Anang madahka pengawa tu semina dikereja opis pengerai tauka opis bekuasa menua aja.

“Kitai tau bebagi awak 10 minit seminggu dikena nentuka kandang pendiau likun ari nya- muk betansang,” pia ku iya.

Mansor madah, mensia mayuh bela megai tanggungpengawa ngemunaska denggi sereta meseti bisi ulah rindu diau ba endur ke beresi.

“Taja kitai sama kisuk napatka pemansang tang anang enda ingat pemeresi mega meseti dijaga,” ku iya madah.

Program nya kemari digulu 340 iku penyereta.

Sama bela datai maya tu iya nya Direkter Opis Pengerai Nengeri Dr Jamilah Hashim, Pemesai Opis Pengerai Sibu Dr Teh Jo Hun, Direkter Sepital Sibu Dr Ngian Hie Ung, Sapit Chairman Opis Kaunsil Sibu (SMC) Rogayah Jemain enggau Direkter Farley Eijing Lau.