Dennis: Raban indu Orang Ulu patut ngemansang diri ba pengawa dagang
MIRI: Raban indu Orang Ulu patut muka runding ngemansangka diri ba pengawa dagang ti dikaul.
Kaban Kunsil Nengeri (ADUN) Telang Usan, Dennis Ngau madahka sida patut ngubah ulah semina nganti enggau berati enti deka mujur agi.
Ku iya, taja penyampau tubuh Orang Ulu dipelaba semina tujuh peratus aja ari 2.7 juta peranak ba nengeri tu tang pekara tu enda nekul sida nyapai pemansang ba pengawa dagang ti dikereja.
Ku Dennis, sida badu agi tinggal ba belakang lalu ulih besemekih enggau bansa bukai enti puh gawa ngulihka pemujur.
“Enti bisi niat deka mujur, kita deka tetemuka chara iya. Aku nemu mayuh indu Orang Ulu mujur ba dagang lalu aku ngarapka penyampau sida tu deka nambah dudi,” ku iya lebuh bejaku bejadika Pengerami Makai Taun Serakup Indu Kayan Telang Usan tauka Doh Kayan Telang Usan (DKTU) ke-2 ba sebuah hotel kemari.
Ba pekara tu, Dennis dekaka raban indu Orang Ulu kelebih agi ba Telang Usan ngena memanah pelasar DKTU dikena ngelala awak dagang ti tau disereta sida.
“DKTU ulih nyadi pelasar raban indu Orang Ulu ngambi bagi ba program pemansang ti dipejalaika perintah kelebih agi ba Baram,” ku iya.
Ku iya, DBKU bisi pangku pengawa besai amat mantu bala kaban nengah kus pengelandik enggau awak dikena ngaul diri ba pemansang nengeri tu.
Ngelansa pasal pengerami nya, Dennis madahka tu peka- ra ti manah lalu iya ngarapka raban dagang indu ba Telang Usan deka seruran gawa ngerembaika dagang sida.
Berebak enggau pengerami nya, Dennis mega nyuaka chek RM15,000 ngagai DKTU.
Dulu ari nya, Chairman DKTU ti nyadi Ketuai Komuniti Orang Kayan Temenggung Elizabeth Deng madah mayuh raban dagang indu Orang Ulu mujur ngenegapka dagang sida sebela enggau sida ti lelaki taja semina nengah industri mit enggau jelan pemesai aja.
“Aku ngansak bala laban DKTU ngena memanah teknologi digital dikena ngemansangka pengawa dagang ti dikaul sida.
“Raban dagang indu patut landik ba teknologi digital enggau bekenaka media rama baka WhatsApp enggau Facebook. Teknologi baka tu ukai semina ngelimat jam, orang gawa enggau belanja aja, tang ulih mansutka untung belipat sereta ngerembaika dagang sida,” ku Elizabeth.