Gerija Roman Katolik nerima geran RM50,000 ari Nanta
KAPIT: Kaban Parlimen ( MP) Kapit, Datuk Alexander Nanta Linggi udah nyuaka geran perintah penyampau RM50,000 ngagai Gerija Roman Katolik ditu lalu pengawa nya udah diatur ba sebuah hotel tebilang ditu, apin lama ke udah.
Ngarika raban gerija nerima geran iya nya David Chuo ari raban Parish Council gerija, laban Father George Omoto enda ulih ngenataika diri, benung bejalai gawa ke menua bukai.
Bela bisi ngemata bala kaban ari Marian Guilds – Chairlady Angelyana Lo, Sekretari Rose Jimban enggau Penulung Tukang Wang Helen Galong.
Sama datai Temenggong Wilfred Billy Panyau, Sapit Chairman PBB Bukit Goram Watson Awan, Pemesai Khas Nanta Ambrose Abong Bugek, Penulung Kanan SK Rantau Panjai David Dumbang enggau chairman Serakup Dayak Iban Sarawak ( SADIA) Kapit, Edward Manggah, sereta bala bukai.
Ngarika raban gerija, David Chuo meri terima kasih ngagai Nanta ti udah gerah jari ngagihka belanja ngagai gerija.
“Sebedau tu kami sebuat bisi nemuai meri basa ti diuluka Father George Omotto enggau Father Mathew Olili, seraya minta belanja laban kami deka bejalaika pengawa ngintu enggau nyeleti gerija, sebagi ari perabung gerija tuduh. Lalu tu begunaka belanja besai, nasit amat Nanta meretika peminta lalu ngagihka belanja,” ku iya nerang.
Dulu ari nya Nanta mega bisi nyuaka belanja penyampau RM50,000 ngagai Gerija Katolik Song.