Bemacham peragam ayan ba pengawa milih sapit presiden PKR laban tu deka nentuka ubah politik Malaysia
KUCHING: Berebutka pangku pengawa antara Datuk Seri Azmin Ali enggau Rafizi Ramli patut diperati nyadi pengawa ti besemekih dalam bilik besai Parti Keadilan Rakyat (PKR), pia ku siku penganalis politik.
Nitih ku pengelicha kanan Universiti Malaya Prof Madya Dr Awang Azman Awang Pawi, bemacham penyarut, laya enggau pelitik, kelebih agi ba pengawa milih sapit presiden laban tu deka nentuka ubah politik Malaysia.
“Enti Azmin menang diberitaka iya deka besai agi awak mangku pengawa sapit menteri besai lalu nyadi menteri besai pengudah jeman Datuk Seri Anwar Ibrahim nyadi menteri besai ila,” ku Awang Azman madah ngagai Bernama kemari.
Abis nadai ku iya, penuduk Azmin nyadi Menteri Pekara Ekonomi deka majak tegap enggau meruan tang enti Rafizi menang, nyangka besai agi peragam iya deka dipadu mangku pengawa ba Kabinet.
Awang Azman mega bepenemu ke alai Azmin enggau Rafizi ti mekit pangan diri laban seduai bela ngembuan personaliti ti kering ba politik.
“Azmin diperati nguasa struktur politik enggau nun- jukka penyulut lebuh dipadu nyadi Menteri Besai Selangor sereta mujur ngemudika Selangor.
“Bisi bala meda Azmin diberi awak mantaika penau politik iya laban enti Anwar enda dijil, nyangka nadai awak nya, seraya Rafizi endang bisi daya matak raban nembiak enggau ulih bejalaika Invoke ti bisi 25,000 kaban volunteer,” ku Awang Azman nampung.
Nitih ku Awang Azman, taja nadai mangku pengawa ba politik, Rafizi agi ulih mekit Azmin.
“Pengering Rafizi dikena memanah raban Invoke, bisi tim ti ngembuan semengat tinggi, ransing gawa, raban indu, gawa siti tim tang bisi tatak ba pemansut wang dibida enggau kem Azmin.
“Tu ngasuh raban Rafizi tinggal ari penyampau menang, kelimpah bisi ubah ba jam kepenudi enti bala penyukung Rafizi ti lari nikal baru ngagai Rafizi,” ku Awang Azman.
Azmin, ku iya, enggau penempa diri ti tenang napi bema- cham jaku pejah ari Rafizi mega bisi tim enggau bemacham strategi ngambika menang.
Awang Azman madahka penuduk wang kem Azmin juga diperati meruan agi ari tim Rafizi ti deka menang tang nadai belanja bejalai ngelawa renggat baruh.
“Jam ke diatu, Julau diperati nyadi kubu kepenudi Rafizi. Enti Rafizi ngenanka menalan, enda putus pengarap enggau bemacham strategi raban ti ngelaban, Rafizi ulih menang mimit.
“Melaka enggau Sabah ti bebaki ba pengawa bepilih mega ulih nyukupka sukung ngagai Rafizi enti nadai ngalih ba jam kepenudi.
“Tang enti Rafizi nyerah alah ba jam kepenudi, Azmin Ali deka muntang menang.
Ba pekara tu, Awang Azman madah semina PKR ulih nunjuk ulih ngatika diri enggau ngemeranka demokrasyen nengah atur bepilih bemacham renggat enggau berebutka penuduk laban PKR udah tuai runding sereta nyadi politik ti kebal sereta manggai ba taun ke 20 iya udah ditumbuh.
Iya bepenemu pengudah bepilih, penyarut ti nyadi deka disuman ba rintai parti ti ditegaka Presiden parti Datuk Seri Anwar Ibrahim.
Ku iya, belalauka sentimen menua, nyata ba atas keretas bepiak ngagai Azmin jam ke diatu. Taja pia, pengawa bepilih kepenudi ba tiga pampang - Kuala Selangor, Pensiangan enggau Tawau - kemari deka ulih nentuka sekalika Azmin tauka Rafizi deka diangkat nyadi Sapit Presiden PKR.
Ketetiga pampang tu nyadi antara 10 pampang PKR kepenudi ngatur pengawa bepilih kemari. — Bernama
Enti Azmin menang diberitaka iya deka besai agi awak mangku pengawa sapit menteri besai lalu nyadi menteri besai pengudah jeman Datuk Seri Anwar Ibrahim nyadi menteri besai ila. Prof Madya Dr Awang Azman Awang Pawi Pengelicha Kanan Universiti Malaya