Penyarut ba palan ngundi PKR Julau nyangka ketegal pemayuh kaban parti
KUALA LUMPUR: Presiden PKR Datuk Seri Dr Wan Azizah Wan Ismail enda nulak nyangka bisi penyarut nyadi ba palan ngundi PKR Pampang Julau ba Sarawak apin lama ke udah ketegal penyampau tubuh kaban parti nya nambah mayuh.
Iya mansutka jaku tu berindik ari penyampau tubuh kaban ti majak nambah, atur pengawa bepilih PKR ba renggat pampang nya majak mar diputar.
“Parti kitai udah ngerembai, suba, bala kaban mimit aja, nya kebuah nadai mayuh penanggul, diatu kitai ngerembai enggau mayuh, nya ti ngasuh mayuh penanggul lalu kitai mega enda ulih ngenggaika nyangka bisi raban ti datai ngerusak parti,” ku iya pengudah pengawa nutup Hari Puteri Renggat Nasional, Raban Puteri Islam Malaysia ba Kompleks Darul Puteri, di Cheras.
Berindik ari nya, Dr Wan Azizah minta Komiti Pengawa Bepilih Besai (JPP) mansik pekara nya ngatika diri dikena ngiga jalai mutarka semua.
Wan Azizah ngelansa pasal pemutus bepilih PKR Pampang Julau, kemari ti digantung tekala nya pengudah raban JPP tetemuka serangan siber ba 10 unit tablet ti dikena bejalaika e-undi.
Chairman JPP, Datuk Rashid Din dipadah mansutka penerang penanggul nyadi dipelaba bepun ari pencerobohan perisian Prey Anti-Theft, nya kebuah ripot bekaul enggau pekara nya dianjung dikena ngulihka timbal penerang raban nyaga pengelikun siber JPP ba Petaling Jaya.
Seraya lebuhka ditanya pasal pemarai siku anak mit indu beumur semilan bulan ba Bandar Baru Bangi kena Hari Empat tu tadi, Wan Azizah ti mega Menteri Pemansang Orang Indu, Ruang Bilik enggau Komuniti ngarapka pesalah ti ngereja penyalah nya deka ditinggang ukum berat.
Iya mega ngingatka apai indai nganjung anak sida ngagai pengasuh ti rejista dikena nyeliahka penusah ke sama nyadi baru.
“Taja iya (laki pengasuh) diperesa positif dadah tang tu penyalah ti nadai penyinu. Pekara ti enda ulih diterima, ulah kitai mensi ti bisi ati sinu udah nadai agi,” ku iya ngelansa pasal penusah anak mit ti parai kemari, pengudah dua hari raya ketegal ulah nadai penyinu laki pengasuh.
Ba penusah 29 iku nembiak mit ba sebuah palan intu gerempung ngintu pengelantang anak patu balu ba Temerloh, dipelaba ‘ dicabul’ enggau dijamah, ku Wan Azizah kesemua sida udah diselamat Opis Pengintu Pengelantang Mensia Mayuh (JKM).
Iya madahka pengudah kesemua sida dibai beperesa ba sepital, 27 iku udah mulaika diri ngagai sida sebilik enggau orang ti ngibun, seraya dua iku agi nadai orang ngibun agi diibun JKM. — Bernama