Berau ti dikumbai tiru deka dipansik ba Johor
SIBU: Opis Pengerai Nengeri deka nganjung chunto berau ti dipadahka berau tiru ngagai makmal di Johor sehari tu.
Direkter Opis Pengerai Nengeri Sarawak Dr Jamilah Hashim madah, naka ke diatu piak sida empai ulih nentuka pengamat berita berau tiru nya.
“Pemutus pansik bekenaka timpuh lalu kitai deka madah nama pemutus nya ila enti udah dikeluarka,” pia ku iya maya berandau enggau pengarang berita, kemari.
Dulu agi ari tu iya nyempulang Sekretari Perintah Sarawak Dato Mansor Man datai bejadi program Besai Beripai Siri 2.0 Munas Aedes Renggat Nengeri Sarawak 2018 di Farley, kemari.
Dr Jamilah madah, sida nadai nerima ripot bekaul enggau pekara nya tang semina nemu ari ripot media sebedau tu.
“Kitai mega empai ulih nentuka nama berau ti dipadahka tiru nya,” ku iya madah baru.
Bekaul enggau pekara tu, Mansor mega ngelalau mensia mayuh datai ngeripot ngagai Opis Menteri Pengawa Dagang Dalam Nengeri enggau Pekara Orang Bebeli Barang (KPDNHEP) nyema tetemuka kes ti sebaka.
“Enti udah diripot, KPDNHEP deka bejalaika pansik nangkan ke nya.
“Ripot tumu ari mensia mayuh besai reti ngagai penemu bala bukai,” pia ku iya.
Maya dipinta meri lalau Dr Jamilah ngelalau mensia mayuh ngambika bejimat bebelika berau.
“Anang teperasa bebelika berau ti kelalu murah nitihka patut.
“Manah agi meli berau ke selalu dibeli sebedau tu,” ku iya madah.
Hari Lima minggu siti tadi, surat berita mantaika ripot bisi kes bebelika berau ti dipadahka tiru.
Penerang nya madah, gamala berau nya endang bisi bida sereta enda baka asi ngelama tu.
Berau nya mega dipadahka baka taya enti udah dipanduk kelimpah ulih tan beberapa hari.