Pengawa ngundi ungkup PKR Pampang Sibu, Nangka mujur taja palan ditukar

SIBU: Taja palan ngundi Parti Keadilan Rakyat (PKR) Pampang Sibu ba Opis PKR Nangka ditukar ngenyit ngagai Ringkat 3, Paramount Hotel, pengawa ngundi pampang tu bejalai enggau mujur naka kediatu.

Chalun ketuai PKR pampang Sibu Abdul Raafidin Majidi madah, iya nerima penerang nya ari Komiti Pengawa Bepilih Bepilih (JPP) PKR.

“Palan keterubah endang ba Opis PKR Nangka di Jalai Kampung Datuk alai kitai udah nyikap semua silik nyengkaum permit polis.

“Tang udah nya, chairman JPP Datuk Rashid Din madahka palan ngundi ditukar baru, urung 9.15 pagi,” pia ku iya maya berandau enggau pengarang berita, tadi.

Abdul Raafidin mega ma- dah, iya nemu pekara nya nengah laman web tang nadai nerima surat bekaul.

“Taja pia pekara tu nadai nanggul.

“Ke beguna iya nya nurun ngundi,” ku iya madah baru.

Ketegal pekara nya, pengawa ngundi pampang tu belabuh ari pukul 10.10 pagi ti sebedau tu deka diatur 9 pagi.

Ba pekara bekaul, Abdul Raafidin madahka diri andal abis nadai 500 pengundi datai ba pengawa nya.

Abdul Raafidin ari tim chalun sapit presiden PKR Datuk Seri Azmin Ali besemekih enggau Abang Ismail Abang Chek sereta Sng Wei Hong.

Naka berita ditulis, pejalai pengawa bepilih PKR pampang Sibu bejalai enggau mujur ari kerejasama antara penyukung tiga iku chalun.