Jaku tuduh penyakal enda bebatang, ku Talib
KUCHING: Tuduh sekeda orang ti madah perintah nengeri deka ngelalai kes projek kuasa solar siti tuduh sengapa, ku Menteri Integriti enggau Ombudsman Datuk Talib Zulpilip.
Ku iya, kes nya diatu benung dipatau Opis Penyeliah Penyalah Makai Suap Malaysia ( SPRM) ke alai sekeda saksi udah dikangau meri penerang.
“Tuduh nya sengapa ditempa dikena bejaika imej manah perintah nengeri. Tu mih pengawa sida, ti mayuh agenda politik enggau enda ngira empas ngagai rayat.
“Tuju penyakal iya nya deka ngelabuhka perintah nengah chara ngaga persepsi perintah nengeri makai suap,” ku iya.
Talib mansutka jaku nya rambau nyimpul jurai aum opis menteri iya ba Aum Dewan Kunsil Nengeri ( DUN) ditu, kemari.
Talib nambah, sida ke ngaga tuduh sengapa nya nguji deka ngerachun runding rayat ngambika rayat pechaya lalu enda ngira sekalika berita nya amat tauka enda.
Projek kuasa solar nyadi sebengkah projek bekal lekterik ungkup sekula di menua pesisir alai kom- peni peribit Jepak Holdings diberi kunterik.
Ngenang kaul bukai, Talib madah projek Musical Fountain Darul Hana ba mua Komplek DUN sigi begunaka belanja ke besai.
“Projek tu chukup komplek kelimpah ti begunaka pengelandik.
“Ambika chunto, fountain di Singapura ke berengkah beoperasyen ba taun 2007 ti begunaka belanja RM91 juta lalu fountain di Dubai beungkus RM910 juta,” ku iya nyaut tanya ADUN Pending Violet Yong.
Berindik enggau nya Talib madah alit ati maya Violet madah Musical Fountain Darul Hana ulih digaga nengah belanja RM5 juta, enti digaga nengah tinda tebuka.
Enti YB Pending chukup pechaya ulih nembuka projek nitihka spesifikisyen Musical Fountain Darul Hana ngena belanja RM5 juta, nya alai mih gaga, tandu Talib.