Perintah besai ditagih mayar chukai ngagai perintah nengeri

KUCHING: Perintah nengeri nagih bayar ari perintah besai ba sentang asil chukai 50 peratus ba industri dagang temuai.

Menteri Dagang Temuai, Seni, Main Asal, Nembiak enggau Lumba Datuk Abdul Rahman Karim Hamzah ( gambar) madah ikas 50 peratus chukai nya udah disetuju perintah besai ke dulu ( Barisan Nasional).

Ba Bajet Menua 2019 ku Abdul Karim nambah, perintah besai ke diatu (Pakatan Harapan) pan udah setujuka chukai nya.

“Lima puluh peratus ari asil chukai dagang temuai ke dikumpul perintah besai udah disetuju dipulaika ngagai Sarawak,” ku iya.

Abdul Karim mansutka jaku nya rambau nyimpul jurai aum opis menteri ba Aum Dewan Kunsil Nengeri ( DUN) Ke 18 di Begunan DUN ditu, kemari.

Iya nambah, ba aum DUN ke diatur ba bulan Julai 2018, perintah besai bisi ngeripot ngagai opis menteri ke alai asil ari chukai ke dikumpul entara September 2017 ngagai Disember 2017 ba penyampau RM439,731 deka dipulaika ngagai Sarawak.

“Tajapia, naka ke diatu kitai mengkang bedau nerima duit nya lalu nya nyengkaum bayar ba taun 2018.

“Kitai ngarap perintah besai nengah Opis Menteri Dagang Temuai, Seni enggau Main Asal ngelengkaska bayar nya,” ku iya.

Naka bulan September 2018 ku Abdul Karim nambah, penyampau chukai ke dikumpul manggai RM4,653,302.

Reti nya, Sarawak patut dibayar RM2,326,651, tandu Abdul Karim.