Perintah nengeri numbuhka ejensi tu dikena nyungkak enggau ngerichahka agi pemansang ba menua Samarahan
KOTA SAMARAHAN: Perintah nengeri deka numbuhka Ejensi Pemansang Wilayah Bersepadu Samarahan (IRSDA) dikena nyungkak enggau ngerichahka agi pemansang ba bagi menua nya.
Pekara tu dibantaika Kepala Menteri, Datuk Patinggi Abang Johari Tun Openg rambau pengerami makai lemai beserimbai enggau Pengerami Makai Taun Ke-2 Kaunsil Mengeri Kota Samarahan (MPKS) ba Balai Suarah Kota Samarahan malam kemari.
Iya nerangka ejensi nya deka mansik enggau meri langgur penemu ngambika atur pengawa pemansang ulih dipejalai chara holistik ba bagi menua Samarahan ti bela deka mungkur sitak Simunjan.
Ku iya, perambu pe- mansang mega deka ngaul semua pengari rayat nyengkaum bala ketuai komuniti ba Samarahan.
“IRSDA tu deka bejalaika pengawa mansik enggau ngelala pemansang ti patut digaga ba Kota Samarahan tu
IRSDA tu deka bejalaika pengawa mansik enggau ngelala pemansang ti patut digaga ba Kota Samarahan tu lalu kitai (Perintah Nengeri) deka nyendiaka belanja ungkup ejensi tu. Datuk Patinggi Abang Johari Tun Openg Kepala Menteri Sarawak
lalu kitai (Perintah Nengeri) deka nyendiaka belanja ungkup ejensi tu.
“Pia mega ejensi tu deka ngaul bala pengari rayat ba Kota Samarahan tu nyengkaum bala ketuai komuniti,” ku iya.
Abang Johari madah, fokus deka diberi ngagai pemansang Samarahan nyadi sebuah wilayah ti ngembuan bemacham pemansut baka tanah, palan pelajar enggau palan dagang besai.
Iya andal ari pemisi IRSDA, Samarahan deka nyadi mengeri ti mansang sereta nyadi sitak pemansang besai kelebih agi ungkup pengawa betanam betupi moden pengudah renyatan jalai pesisir tembu nyengkaum tiga jematan, iya nya Jematan Samarahan, Jematan Batang Sadong enggau Jematan Batang Lupar ti nyambung Kuching enggau sitak bukai nengah Samarahan.
Ngelansa pasal penanggul jalai sekut ba menua nya, Abang Johari nerangka projek ngelekatka lampu trafik ba tiga bulatan besai deka dipejalai ba pun taun baru.
Iya nerangka sistem lampu trafik ba tiga bulatan nya mega deka ngena chara pemadu baru pejalai trafik ngambika lanchar.
Nyaut langgur penemu dibantaika Chairman MKPS Datuk Peter Minos senentang pengawa ngaga Transit Aliran Ringan (LRT) dikena nyambung Samarahan enggau Kuching, ku Abang Johari, kandang diatu Perintah Nengeri meri pemerat ngagai pengawa nyendiaka penyikap perengka guna pemun ungkup rayat ba nengeri tu.
“Kandang diatu, aku nangguhka dulu juluk ngaga LRT tu, enti semua penyikap perengka guna pemun rayat udah diputarka lalu kitai bisi belanja ti chukup, kitai deka nampung pengawa tu dudi hari,” ku iya.
Dulu ari nya, Minos ba jaku dipansutka iya madahka MPKS deka seruran netapka jaku meri servis pemadu manah ngagai komuniti ba Samarahan.
“Kota Samarahan diatu nyadi menua richah amat lalu kitai deka seruran ngemanahka servis dikena nangkup peminta komuniti ba sitak tu,” ku iya.
Sama datai bini Kepala Menteri Datin Patinggi Datuk Amar Juma’ani Tuanku Bujang, Menteri Dagang Temuai, Seni, Main Asal, Nembiak enggau Lum- ba Datuk Abdul Karim Rahman Hamzah enggau Menteri Kaunsil Kandang Menua enggau Pengawa Berumah Datuk Dr Sim Kui Hian.
Bala bukai sama datai nyengkaum Kaban Kunsil Nengeri ( ADUN) Stakan Dato Sri Mohammad Ali Mahmud, ADUN Muara Tuang Datuk Idris Buang, Residen Bagi Menua Samarahan Ibrahim Lumpu sereta bala temuai dipebasa bukai.