Skim Pengentap Baru Sungai Asap ulih nyadi pemansut besai pemakai
KUCHING: Skim Pengentap Baru Sungai Asap semak Belaga bisi pengulih dikemansang nyadi pemansut besai pemakai ba nengeri tu, ku Sapit Kepala Menteri Sarawak Datuk Amar Douglas Uggah Embas.
Iya mansutka jaku iya nuju bala kaban komiti pemansang enggau trasformasyen betanam betupi sitak nya ti diketuaika Kaban Kunsil Nengeri (ADUN) Murum Kennedy Chukpai Ugon ti ngatur penemuai ngelawa iya ba opis iya kemari.
Ku iya, perintah nengeri nengah Menteri Betanam Betupi Moden, Tanah Adat enggau Pemansang Kandang Menua enggau ejensi perintah deka bekerejasama rat enggau komiti nya bejalaika pengawa ngemansangka pengulih sitak nya.
“Kita bisi tanah enggau orang gawa bepeneleba sereta orang bumai ti bagas gawa. Aku bisi perambu ngemai kelala betanam betupi chara moden baka fertigasyen enggau hidroponik ti ulih mansutka produk betanam betupi bisi kualiti lalu mansutka penatai pemisi mayuh agi,” ku iya.
Kus latih betanam tau diatur lalu bantu diberi ngagai sida ti bisi ati.
Iya merambu ngambika sida nanam chabi, semangka wangi, sawit, lada chelum enggau padi.
“Pia mega bisi pengulih besai ngaul diri ba pengawa nanam rian Musang King enggau nupi kelulut ti ngasilka madu tauka nupi ikan,” ku iya.
Perintah nengeri ku iya ulih mantu ba pekara makit.
Pekara pemadu beguna, projek mesti diintu memanah dikena nentuka pemujur iya.