Pengerami ATILA 2018 SMK Simanggang mujur
KUCHING: Pengerami Anugerah Tiang Laju (ATILA) 2018 SMK Simanggang udah mujur diatur kena 8 November tu tadi.
Nitih penerang ari Pengajar Nicholas Balai, ATILA diatur ninting taun lalu nyadi sebengkah pengerami ke chukup besai reti dikena meri kelai basa ngagai bala nembiak ti udah teulihka pemujur ba akademik enggau kokurikulum sepanjai taun.
“Kelimpah nya, pengerami tu mega nyadi pelasar endur ngerapitka kaul entara piak sekula enggau apai indai nembiak nengah Gerempung Apai Indai eng- gau Pengajar ( PIBG) sereta piak bukai,” ku iya.
Berebak enggau nya, Prinsipal SMK Simanggang Pengajar Ramlee Bin Bee madah, pengerami tu diatur dikena meri basa ngagai penyulut bala nembiak.
“Bala nembiak ke nyulut ba mayuh bidang baka akademik enggau kokurikulum udah diberi basa nengah setipikit enggau perais ari piak sekula.
Dulu ari nya, pengerami ATILA 2018 udah dikemujurka Residen Bagi Menua Sri Aman, Indit Bangai ti ngarika Menteri Muda Pengelantang Komuniti, Datuk Francis Harden Anak Hollis.
Bejaku ba pengerami nya, iya meransang bala nembiak ngambika terus ransing nyapai pemujur seriris enggau juluk Pelajar Menua ti ngemeratka pemujur sebela ari sukut runding, ulah pendiau enggau pemereti ati.
Entara anugerah ke bisi disua maya tu iya nya Anugerah Setipikit Ketuai Nembiak, Anugerah Pemadu Nyulut Mata Pelajar, Anugerah Pemadu Nyulut Akademik Genap Pom, Anugerah Kokurikulum, Anugerah Setipikit Nyulut Peresa Perintah 2017 ( PT3, SPM), Anugerah Tokoh Dikearap Kokurikulum, Anugerah Tokoh NILAM, Anugerah Nembiak Dikearap enggau Anugerah Nembiak Chunto.
Ungkup taun tu, nembiak ke dipilih menggi gelar Anugerah Nembiak Chunto iya nya Issac Lee Ning ari Pom 4 AL.
Pengerami nya dirichahka enggau sekeda pengawa merindang atas panggau dikemujurka bala nembiak ari sekula tu empu baka tim penari ke digelar Raban Pangau Libau 2.
Sama bisi datai pengari Pemesai Opis Pelajar Pelilih Sri Aman, Stephen Semion, YDP PIBG Haji Abdul Rahman Bin Haji Muhiyuddin, Pemesai Pelilih Sri Aman Ismawie Bin Salleh, bala pengajar kanan enggau bala apai indai nembiak.