IMASC Bintulu udah mujur ngatur aum keterubah
BINTULU: Impact Matters Agora Speakers Club 75 (IMASC) Bintulu udah ngeluarka penerang keterubah lalu sida bebala mayuh udah datai ngagai aum apin lama ke udah.
IMASC iya nya sebuah gempung ti udah direjista sereta dikemendarka Opis Pengerejista Gerempung ( ROS) enggau tuju nyendiaka mensia mayuh pelasar ti lantang nyadi ketuai, nyadi kaban pemansang, bejaku ba mua mayuh enggau bejuaraika pengelandik ngena Jaku English.
IMASC begempung enggau bala Pengelicha Antarabansa Agora ti nyadi gerempung ke nadai ngulihka penguntung nengah raban volunteer ari serata dunya ti gawa mantu mensia mayuh ngemansangka pengelandik bejaku, komunikasyen, runding kritis, debat enggau pengelandik nyadi ketuai.
Pengelandik mantaika penemu enggau bejaku ba mua mayuh beguna amat dikena ngulihka pemujur ba endur gawa lalu mayuh orang mayar bayar ti tinggi ungkup seminar dikena ngulihka penemu enggau pengarap ati ti dikena betunga enggau bala bukai.
Agora nyendiaka pilih ti enda kelalu mar lalu diangkunka raban dagang. Chara ti udah nyata dipeda sereta rindu ti dikemeran sereta ngansah komunikasyen enggau pengelandik nyadi ketuai.
Barang sapa bisi ati nyereta kelab tau betelefon nuju Peter Voon ba lumur 019-8842484 tauka ngelawa facebook enggau Instagram kelab ba se- barang penerang baru.
Mensia mayuh, raban korporat, orang ngatika diri, gempung ukai dikuasa perintah enggau kelab bukai endang diperansang ngambi bagi ba IMASC ba semua ‘outreach’ komuniti kelab ti deka diatur enda lama agi.