Projek pemansang ke udah dikemendar tang dikinsil ditagih
KUCHING: Sarawak nagih semua projek pemansang ke udah dikemendar tang pengudah nya dikinsil perintah besai.
Menteri Pengintu Pengelantang Pendiau, Komuniti, Orang Indu enggau Pemansang Anak Mit Dato Sri Fatimah Abdullah madah, pekara nya sigi tanggungpengawa perintah besai.
“Maya kitai numbuhka Federasyen Malaysia nengah Sempekat Malaysia 1963 (MA63), kitai setujuka sempekat rama enggau politik.
“Kitai pechayaka perintah besai ba sentang pekara pemansang, pengelikun, pelajar, pengerai, berumah enggau pemaik rayat, sida patut meri basa ngagai MA63.
“Ngelama ke udah, Perintah Sarawak sigi seruran ngenataika pinta ba pekara tu nengah semengat begulai baka dalam sebuah ruang bilik.
“Kitai ngarap pinta kitai diberi ketuai ruang bilik ( perintah besai) tang enti sempekat udah enda dipebasa, munyika jaku Tok Nan-kitai deka nentuka kuing diri,” ku iya.
Fatimah mansutka jaku nya ba Aum DUN ditu, kemari.
Ketegal nya ku iya nambah, Sarawak enggai nyadi enda ngiga penatai pemisi diri ngambi tau dikena melanja projek pemansang.
Ku iya, infrastruktur baka ke jalai alun, bekal lekterik enggau ai meseti digaga lalu pia mega begunan, jematan, ngemanah sekula repuk.
“Kitai meseti ngemujur semua projek ke udah dikinsil perintah besai lalu tu mih pekara berat diatu,” ku Fatimah. KAPIT: SK Nanga Mujong, Baleh, Pelilih Bukit Goram udah nemuai seraya belajar ngagai SM Sains Kuching Utara (SAKURA), Jalai Matang apin lama ke udah.
Raban SK Nanga Mujong datai ari lapan iku pengajar enggau 11 iku nembiak Primari Enam ti udah ngambi peresa UPSR dalam pun bulan September 2018 tu tadi.
Betuaika penulung kanan sekula, pengajar Donny Segie Thomas enggau pengajar Keriti Taaga, sida nemuai sehari ngagai SM Sains Kuching Utara.
Sida sebuat mega bisi nemuai ngagai indu mengeri Kuching meda begunan ke nyadi kelai menua baka Begunan Dewan Kunsil Nengeri ( DUN), Begunan Yayasan Sarawak, Wisma Bapa Malaysia, Kuching Waterfront, enggau ke bukai.
Ba sekula, sida dibai bejalai meda perengkaguna sekula, kelas, buding, perengka lumba enggau main, kantin, balai begempuru, bilik sumber, librari, enggau ke bukai.
Sida mega bisi ngulu program meri penerang ba bilik sumber sekula ti dikenataika pengajar Ahmad Adham enggau pengajar Hairul ari SAKURA. Fokus pasal usul sekula, perengkaguna sekula enggau kriteria dikena ngerejista diri ba SM Sains Kuching Utara pengudah tembu UPSR ngambika nampung pelajar ba Form Satu.
Ahmad Adham ti kala gawa ba SMK Selirik, ngajar subjek Sains ( Matematik enggau Sains) madahka perintah nengah Opis Menteri Pelajar ( MOE) udah ngena mayuh belanja dikena numbuhka SM Sains Kuching Utara nyendiaka pelajar bisi kualiti tinggi.
“MOE udah ngena mayuh belanja numbuhka SM Sains Kuching Utara. Tu sekula bemalam ti ngerejista bala nembiak ti teulihka pemutus ke nyulut ba UPSR nampung pelajar sida ba sekula sekondari tu ke datai ari serata nengeri.
“Sekula tu disikap enggau perengkaguna dikena nempa enviromen ngajar enggau belajar ti lantang sereta mai pemaik ngagai bala nembiak ti deka nyulut. Nembiak ti bulih pemutus nyulut ba UPSR diperansang nganjung peminta,” ku Adham.
“Dikearap pengudah pejalai tu, bala kita deka mereti silik agi enggau ngenang pemanah pengawa MOE ti tuju sida nempa nembiak nyulut. Maya diberi peluang belajar ditu, rebut peluang nya laban batang tuju SAKURA deka mantu nembiak seranta ti datai ari komuniti menua pesisir ngasaika perengkaguna pelajar kelas satu,” ku Adham nambah.
Iya nesal laban taun nyin tadi, 2017, dua iku nembiak ari SK Nanga Mujong ti dipilih nampung pelajar ba SM Sains, tang penujung iya, apai indai sida enda nerima laban sida enda nemu pasal perengkaguna enggau tuju sekula nya ditumbuh ke nempa penyulut ba akademik.
Berebak enggau nya, pengajar Donny Segie Thomas ari SK Nanga Mujong meri terima kasih ngagai SM Sains Kuching udah nerima peminta sida nemuai ngagai sekula nya.
“Batang tuju penemuai kami, bala pengajar enggau nembiak primari enam, ngambika nembiak SK Nanga Mujong muka runding sida lalu nemu pasal perengka guna ke bisi ba luar Kapit.
“Kami ngarapka nengah penemuai tu deka meri peransang ngagai bala pengajar enggau nembiak ari sekula menua pesisir,” ku Donny.