Bukti pengawa salah udah disua ngagai SPRM Sarawak
Vernon datai baru ngagai Indu Opis SPRM Sarawak lalu mai ‘thumb drive’ ngundan bukti bekaul isu bepilih PKR di Julau
KUCHING: Ketuai Pemadah Parti Keadilan Rakyat ( PKR) Sarawak, Vernon Kedit datai ke mua kedua kali ngaga ripot ngagai Komiti Nagang Makai Suap Malaysia (SPRM) senentang isu bepilih ba bagi menua Julau, sekali tu mai ‘thumb drive’ ti ngundan ‘bukti’ salah pengawa ba sitak nya.
Iya datai ba Indu Opis SPRM Sarawak ditu urung pukul 9.15 pagi semalam, madahka bukti baru nya tegap amat ti nyengala nunjukka ulah nipu ba Julau dikena memanipulasi proses enggau asil bepilih PKR.
“Kami diatu bisi bukti ti enda ulih disangkal ke alai pengawa meli undi nyadi kena 10 November tu tadi ba Julau, lalu tu bukti nyata ulah nipu enggau penyalah ba din.
“Dalam ‘thumb drive’ mit tu iya nya bukti ti balat ngasuh tekenyit, pengawa makai suap terang dikereja lalu nadai ulih disekat nyadi ba Julau kena 10 November tu tadi.
“Isi iya ngasuh ati balat pedis lalu modus operandi
Dalam ‘thumb drive’ mit tu iya nya bukti ti balat ngasuh tekenyit, pengawa makai suap terang dikereja lalu nadai ulih disekat nyadi ba Julau kena 10 November tu tadi. Vernon Kedit Ketuai Pemadah PKR Sarawak
chukup kamah,” ku iya ti bela disempulang beberapa ketuai pampang PKR bukai.
Taja pia iya enggai meri tauka mantai bukti ti bisi dalam ‘ thumb drive’ nya, laban dikena ba pansik SPRM.
Dulu ari nya ku Vernon, kena 10 November urung 1,000 kaban PKR Bagi Menua Julau udah nurun ngundi ba renggat parti lalu baka ti udah dijangka sebedau nya, mayuh bala kaban ti udah direjista enggau meragukan.
Berebak enggau nya, Ketuai PKR Betong madahka bemacham ripot polis udah digaga bala kaban ti madah enda nemu diri direjista tauka nadai pemendar ari sida.
Taja pia ku iya, nadai sebarang atur dipejalai raban ngatur pengawa parti mutarka pekara nya, tang semina meda nadai salah pengawa dalam parti.
“Kami meri terima kasih ngagai pengawa berani bala kaban ba Julau ti datai ke mua mantaika pengawa salah makai suap tu, ti ngamahka nama parti kami,” ku iya.