Mayuh aktiviti diatur kena ngerami balai baru ba SK Nanga Entaih
JULAU: Sekula Primari (SK) Nanga Entaih semak ditu udah ngerintai bemacham aktiviti beserimbai enggau pengawa bejadika balai baru ti baru tembu kena malam Hari Enam.
Siti ari aktiviti nya pekit main bol ti nyendiaka perais RM1,000 ungkup tim champion, RM700 (lumur dua) enggau RM400 (lumur tiga) sereta mujur matak 12 tim bepekit.
Pekit bukai iya nya Sepak Takraw ti mujur amat matak 24 tim, tanda Poco- Poco enggau Betabuh.
Batang pengawa disimpul enggau pengerami makai lemai sereta pangau pemerindang ti udah digulu lebih 600 iku, nedat balai baru nya deka beperindang.
Kaban Kunsil Nengeri (ADUN) Meluan, Rolland Duat ti ngagihka sebagi ari belanja Projek Transformasyen Menua Pesisir (RTP) iya ungkup balai baru nya udah dikangau datai bejadika pengawa.
Ba jaku dipansutka iya, Rolland nyamin semua sekula ba Meluan deka bulih ungkup sida ari RTP ninting taun enggau belanja Projek Mit Pemansang Menua Pesisir (MPR).
Pia mega sekeda sekula deka dipilih nerima belanja dikena ngemanahka penyikap perengka guna baka balai tetiap taun, semua sekula deka bulih ungkup ari belanja MRP, ku iya, seraya nambah, pemerat deka diberi nitihka pematut ba kes ti patut diputar jampat.
Ba kes SK Nanga Entaih, taja udah diberi balai baru, iya deka berundingka peminta ngambika batang paip lama ditukar, ku Rolland ti ngemendarka agih belanja RM50,000 ungkup tuju nya.
Iya mega ngemendarka agih belanja penyampau RM10,000 ngagai sekula dikena ngatur pengawa enggau RM3,000 agi dikena sekula bebelika kereban ngajar enggau belajar.
Kelimpah ari nya, komu- niti dia deka ulih ngasaika idup meruan agi laban mayuh belanja deka diagih perintah nengeri dikena ngaga infrastruktur pemun baka jalai enggau penyikap perengka guna baka bekal kuasa karan enggau bekal ai ari grid besai, ku iya.
Naka diatu, iya udah nerima jaku gerah ari Kepala Menteri ngambika jalai Engkamop/ Entabai diangkat nyadi jalai belakin datai ba taun 2019 tauka 2020, deka disambung ari Kubu Brooke ngelawa Rumah Gerasi.
Berita manah bukai iya nya projek bekal ai beungkus RM79 juta udah dikemendar ti mungkur kandang menua Meluan/ Entabai enggau sepanjai Jalai KJD, ku iya nambah.
Kepala Pengajar, Stephen Johnson Jenau enggau Chairman Serakup Apai Indai enggau Pengajar (PIBG), Marthin Mut ti bela bejaku ba pengawa meri terima kasih ngagai Rolland ti udah beratika peminta sekula, kelebih agi SK Nanga Entaih.