Hung mejah petenah madah pengawa bepilih PKR Lanang dibeli ngena duit
SIBU: Petenah madahka pengawa bepilih ketuai dalam Parti Keadilan Rakyat (PKR) Lanang bekenaka duit meli undi dipejah ketuai pampang parti nya Hung Soon Kieng.
Petenah nya ku iya, nadai bukti ti chukup dikena mandangka iya maya nya bisi ngena politik duit.
“Ke batang iya, kami bisi meri voucher RM7 enggau chara terang (enda belalai) ngagai semua pengundi enda milih ngundi Mohd Rafizi Ramli tauka Datuk Seri Mohamed Azmin Ali.
“Tang nya ukai dikena meli undi nambahka nadai kebuah aku bekenaka duit meli undi laban nadai orang ngelaban ba penuduk nyadi ketuai pampang,” pia ku iya maya aum media, ensana.
Sama bela datai maya aum media tu iya nya Ketuai Pam- pang PKR Kanowit enggau Sibu, George Chen enggau Abdul Raafidin Majidi.
Sebedau tu, pengari chalun Rafizi, Shatiri Mansor begulai enggau lima iku agi ti datai maya pengawa bepilih pampang Lanang ensana madahka diri melabaka meda pen- gawa bekenaka duit (politik duit) maya bepilih pampang Lanang nya.
Sida meda tim chalun Hung mai bala bukai tama ngagai kelinik ba baruh palan ngundi lalu pansut baru enda lama udah nya.
Sida mega madahka diri bisi ngambi video pengawa nya sebedau mindah ngagai palan bukai ke besemak.
Ketegal nya, sida udah ngaga siti ripot polis sereta madahka diri enda ngenggai meri kerejasama nyaup mansik pekara nya ketegal ngetanka pemanah nama parti.
Hung mega madah, voucher nya diberi dikena nyaup bala pengundi lebih agi sida ti datai ari menua jauh.
“Kitai kasih meda sida ke datai ari jauh.
“Pia mega sida ke semak ditu. Nya alai voucher tu diberi kitai enggau terang,” ku iya madah baru.
Maya ditanya bisi ke enda iya ngaga ripot polis bekaul enggau pekara nya, ku iya, iya nadai ati deka ngaga ripot polis.
“Aku semina deka nerang ngagai mensia mayuh nerangka petenah tu,” ku iya nimbal tanya.