Semua suku bansa di Sarawak nadai ditagang ngemeranka pengarap diri
ENGKILILI: Peneka milih pengarap sereta ngemeranka daya idup raban bansa diri endang dijamin lalu sigi enda ditagang tang dikelalu ba baruh pegai Perintah Nengeri Sarawak.
Kaban Kunsil Nengeri (ADUN) Engkilili Dr Johnical Rayong Ngipa madah nadai sekat ngagai kesemua 28 suku bansa ba Sarawak beridup nyengkaum ba pekara pengarap laban tu endang akar penyerakup, pengelantang enggau idup bebaik dalam komuniti kenyau ari menya.
“Taja pia, perintah nengeri beratka penyerakup laban sedar pekara tu mudah lenyau ngujungka serakup ti diasai ngelama tu pambar,” ku iya.
Iya mansutka jaku nya lebuh bejaku bejadika Program Merarau beserimbai enggau pengawa masu pala, bejadika rumah pada enggau endur paking entukar Gerija St. Michael Engkilili ba Balai Kaunsil Pelilih Lubuk Antu Engkilili, ba Engkilili ensana.
Ku iya, sedarka pemesai guna penyerakup pupu bansa ti nadai ditagang ngemeranka daya idup enggau pengarap udah meri penemu ngagai niang Pehin Sri Adenan Satem numbuhka siti gempung khas dikelala enggau nama Unit Pekara Pengarap Bukai (UNIFOR) kena 26 Mei 2017.
“Tu iya ti keterubah ditumbuh ba menua tu kelebih agi dikena matau polisi ti nerenakka pengelantang antara pengarap kelimpah nyerenih, merambu enggau ngempung polisi enggau undang-undang bekaul pekara pengarap ukai Islam ba Sarawak,” ku iya.
Ku iya, UNIFOR di baruh pegai Sapit Kepala Menteri Datuk Amar Douglas Uggah Embas lalu diketuai Datu Dr Ngenang Jangu ti nyadi direktor deka nyadi pelasar ba peminta belanja enggau tanah dikena ngaga chapel, gerija tauka tepikong baru tauka pengawa nyeleti.
“Siti ari pemeri UNIFOR ungkup gerija tu iya nya ngaga paking entukar beungkus RM200 ribu baka ti dipeda kitai sehari tu (kemari), kelimpah pemeri bukai ti datai ari belanja MRP enggau RTP, penyampau urung RM1 juta, kenyau ari aku nyadi pengari rayat,” ku iya seraya nambah, bisi mega mantu chapel, gerija, masjid enggau tepikong ti bisi ba sitak DUN Engkilili.
Pia mega ku iya, Gerija St. Michael bela disikap ngena aircon berega RM70,000 ti deka dilekat enda lama agi.
Iya madahka diri chukup keran mantu rumah sembiang di baruh sitak Engkilili, ukai semina chapel Anglikan aja tang mega rumah pengarap bukai laban sedarka pemanah nasit diasai diatu datai ari Tuhan lalu deka malas nengah pengawa ngaga enggau nyendiaka perengka guna ba rumah sembiang ti meri pengelantang ngagai sida ti megai pengarap.
“Ari nya, aku nesau semua kelebih agi raban megai pengarap Anglikan ditu begempung sereta seruran bekerejasama enggau pengari rayat ngerembaika jaku Tuhan, tau dikereja ba rumah panjai, ba gerija enggau chapel,” ku iya.
Berebak enggau nya, The Right Reverend Bishop Nelson Ugas Bulang ti nyadi Sapit Bishop Kuching madahka diri temegah ati meda pengarap Anglikan majak ngerembai ba semua chapel enggau gerija serata Sarawak.
“Tu ngayanka pengarap diterima mayuh lalu dekaka semua pada, sub deacon enggau bala bukai seruran komited, bisi juluk sereta mansang ke mua taja napi penanggul suntuk pada,” ku iya.
“Aku mega ngelalau semua ngaul diri semak enggau bekerejasama enggau pengari rayat menua tu nyadi jalai pemadu manah ngulihka belanja dikena melanja pengawa sereta perengka guna ti diguna ba chapel enggau gerija,” ku iya.
Sama datai Pada Peter Augustine ti nyadi Priest In - Charge Gereja St. Michael, Archdeacon Jamal Senada, bala pengari gerija enggau chapel ngelingi DUN Engkilili, bala kaunsilor, tuai rumah enggau bala bukai.