Dalam Bajet 2019 Perintah Besai enda nyemetak madah sekalika program tu agi dipelanja perintah besai tauka enda

KUCHING: Agih belanja ungkup Program Nyukat Tanah Hak Adat Bumiputera (NCR) Inisiatif Baru ke taun 2019 deka diperunding ngambika nitihka guna ba pengawa nyukat sesebengkah kandang menua.

Sapit Kepala Menteri ti mega Menteri Pemansang Mengeri enggau Pengeraja Asal Kedua, Datuk Amar Awang Tengah Ali Hasan madah, perintah seruran chakah ngenyampatka pengawa nyukat tanah NCR ti pengawa nyukat perimeter nengah Program Nyukat Tanah Hak Adat Bumiputera (NCR) Inisiatif Baharu ngena agih belanja ti dipelanja perintah besai.

Kenyau dipejalaika ari bulan Oktober 2010 ku iya, sepenyampau RM161 juta udah diagihka, lalu ungkup Langgur Pemansang Malaysia Lumpar Ke- 11 aja sepenyampau RM90 juta udah dikemendarka.

Ku iya, dalam Bajet 2019 Perintah Besai enda nyemetak madahka pekara tu seka- lika program tu agi dipelanja perintah besai tauka enda. “Laban nadai agih belanja ke nyemetak dikemendarka perintah besai Pakatan Harapan ungkup taun baru dikena bejalaika program tu, nya alai perintah Gabungan Parti Sarawak (GPS) deka nyendiaka agih belanja ungkup Program Nyukat Tanah Hak Adat Bumiputera ( NCR) Inisiatif Baru tu.

“Aku ngarap sereta minta perintah besai di baruh Pakatan Harapan deka terus ngagihka belanja dikena neruska program tu,” ku iya ti mega Menteri Pemansang Industri enggau Orang Dagang.

Awang Tengah mansutka pekara nya lebuh ti nyimpul jurai Opis Menteri Pemansang Mengeri enggau Pengeraja Asal ba hari Ke7 Aum ke-2 penggal ke-3 Kunsil Nengeri (DUN) Ke18 ba Begunan DUN ditu, kemari.

Renggat keterubah, pengawa nyukat perimeter dipejalaika ungkup ngazet nya nyadi Rizab Komunal Bumiputera (Bertanam Betupi ari baruh Seksyen 6 Kanun Tanah Nengeri, ku iya, naka Oktober 2018, ke alai sepemesai 870,265 hektar (2,150,425 ekar) udah mujur disukat perimeter.

Ari penyampau nya ku iya, sepemesai 687,258 hektar (1,698,215 ekar) di serata nengeri sarawak udah digazet.

“Ba renggat kedua program tu, kandang endur ari baruh Seksyen 6 nya deka disukat nengah chara lot individu.

“Naka ke diatu bisi 22,983 lot individu udah mujur disukat ti mungkur 28,807 hektar (71,182 ekar) sereta deka diberi surat pala tanah nengah Seksyen 18 Kanun Tanah Nengeri.

“Aku minta semua ti nuntut tanah NCR meri kerejasama penuh ngagai Opis Tanah enggau Survei ngambika pengawa nyukat tu ulih dipejalaika enggau lanchar kelebih agi ti bekaul enggau lot individu,” ku Awang Tengah.

Laban nadai agih belanja ke nyemetak udah dikemendarka perintah besai Pakatan Harapan ungkup taun baru dikena bejalaika program tu, nya alai perintah Gabungan Parti Sarawak (GPS) deka nyendiaka agih belanja ungkup Program Nyukat Tanah Hak Adat Bumiputera (NCR) Inisiatif Baru tu. Datuk Amar Awang Tengah Ali Hasan Sapit Kepala Menteri ti mega Menteri Pemansang Mengeri enggau Pengeraja Asal Kedua