Anjung Usahawan Sri Aman dipelaba tembu ujung taun 2018
KUCHING: Projek ‘Anjung Usahawan’ Sri Aman dipelabaka deka tembu ujung taun 2018.
Sapit Kepala Menteri ti mega Menteri Pemansang Industri enggau Orang Dagang Datuk Amar Awang Tengah Ali Hasan madah, projek nya nyendiaka perengkaguna endur orang dagang di nengeri tu ngumpul, proses, mandang enggau nyual produk sida.
“Naka ke diatu, perintah nengeri udah ngemansangka 7 buah Anjung Usahawan ti sepenyampau RM12.5 juta nengah agih belanja ari TERAJU.
“Pengawa ngaga Anjung Usahawan Betong, Damai, Gedong, Semariang, Limbang enggau Lawas udah tembu, lalu Anjung Usahawan Sri Aman dipelabaka tembu ujung taun 2018.
“Projek nya deka nyendiaka 74 ruang palan dagang orang dagang menua tu,” ku iya lebuh ke nyimpul jurai Opis Menteri Pemansang Industri enggau Orang Dagang.
Iya nyimpul jurai nya ba hari Ke-7 Aum ke-2 renggat ke-3 Kunsil Nengeri (DUN) ke-18 ba Begunan DUN dit, kemari.
Bepelasarka penyulut Program Anjung Usahawan ke udah bisi, iya madahka opis menteri iya deka ngerembaika program nya jauh agi ti dipejalaika bererenggat.
“Opis menteri deka neruska pengawa ngaga Anjung Usahawan ti besai sereta chukup agi di nengah chara bererenggat.
“Ungkup taun baru, opis menteri udah diberi perintah nengeri agih sepenyampau RM14.5 juta dikena bejalaika 6 Anjung Usahawan,” ku iya ti mega Menteri Pemansang Bandar & Pengeraja Asal II.
Kelimpah ari nya Awang Tengah lebuh ti ngenang pasal Bajet Perintah Besai 2019 iya madah, diagihka penyampau belanja besai ke tuju pemansang orang dagang di baruh inisiatif Nererak Budaya Menua Dagang dalam semua sektor ekonomi.
“Tang kitai enda nemu berapa pemayuh ti diagihka ngagai Sarawak lalu nama program ke dipejalaika.
“Sigi beguna amat perintah besai madahka kitai bagi agih belanja nya enggau nama ban sa program ke dipejalaika di Sarawak.
“Baka ke udah, opis menteri aku deka terus meri kerejasama penuh ngagai perintah besai enggau ejensi sida di nengeri tu, dikena nentuka penyulut inisiatif enggau program ke dipejalaika ti meri penguntung ngagai Orang Dagang Mit enggau Jelan Pemesai (SMEs),” ku iya.
Berebak enggau tu iya mega madahka opis menteri pemansang industri enggau orang dagang bejalaika inisiatif dikena nambah sereta negapka penyereta mensia mayuh dalam bidang dagang.
Mayuh program, projek enggau aktiviti pemansang orang dagang di mengeri enggau menua pesisir udah dipejalaika enggau juluk ulih ngangkatka produktiviti sereta ngambika orang dagang ulih besemekih betapi enggau pemar dunya, ku iya.
Entara inisiatif ti dipejalaika baka Pemandang Orang Dagang, Kus Teknologi Memproses Pemakau, Simposium Orang Dagang Kunteriktor enggau Seminar Mantaika Pasal Industri 4.0 kelimpah nyendiaka Program Bantu Wang Turu enggau Kereban.