Masing: Projek intervensyen menua pesisir ungkup taun 2019 deka majak dipejalaika
KUCHING: Opis Menteri Pemansang Infrastruktur enggau Perengka Pengangkut deka majak chakah bejalaika intervensyen menua pesisir ke meri empas besai dinengeri tu dalam taun 2019.
Sapit Kepala Menteri ti mega Menteri Pemansang Infrastruktur enggau Perengka Pengangkut, Tan Sri Datuk Amar James Jemut Masing madahka projek nya nyengkaum ngemanahka sekula, ngemanahka jalai batang enggau ke bukai.
“Ungkup taun 2019, kami deka terus bejalaika sekeda projek intervensyen menua pesisir ke meri empas besai baka pengawa ngemanahka 47 sekula tuai sereta repuk enggau 22 buah klinik pengerai menua pesisir ke udah tuai sereta mega repuk.
“Nambahka nya pengawa ngemanahka jalai batang mega deka majak dipejalaika.
“Kami mega deka ngaga sereta nembuka tiga projek Bekal Ai Alternatif Sarawak (SAWAS), 53 projek ari baruh program ker dikumbai ‘Communication Pipe and Submain’, dua projek dari baruh program loji meri ai enggau ngemaru tauka nganti lama,” ku iya.
Masing madahka pekara nya lebuh ti nyimpul jurai Opis Menteri Pemansang Infrastruktur enggau Perengka Pengangkut ba hari Ke-7 Aum ke-2 Penggal ke3 Kunsil Nengeri (DUN) ke-18 ba Begunan DUN ditu, kemari.
Bejaku baru iya madahka opis menteri iya mega deka neruska pengawa bejalaika projek nyambung kuasa karan ngagai 6,856 rumah di menua pesisir nengah Skim Elekterik Menua Pesisir (RES), skim hibrid enggau Skim Bekal Kuasa Karan Alternatif Menua Pesisir (SARES) kelimpah bejalaika 26 projek nagang ampuh bah
“Kelimpah ari nya mega deka terus ngemujur sereta nembuka pengawa nyukat lot betanam betupi enggau kebun ba tengah laman di Skim Palan Pengentap Baru Tegulang Belaga.
“Kami mega deka neruska program meri penyedar sentang rampa menua enggau raban bansa nengah program KRA baru Effective Enforcement and Environment,” ku iya seraya madahka rayat di menua pesisir patut disediaka infrastruktur enggau pelasar utiliti enggau naka pengelengkas.