Ekonomi Sarawak dipelabaka deka ngerembai ba taun 2019, ku Wong
KUCHING: Menteri Wang Kedua, Dato Sri Wong Soon Koh madahka ekonomi Sarawak dipelabaka deka ngerembai 5.0 peratus ba taun 2019 dibandingka 4.6 peratus taun tu.
“Pengerembai ekonomi nya disukung ‘higher injection’ ‘investment’ pengawa bejalaika projek infrastruktur besai baka inisiatif transformasyen menua pesisir, projek walkabout, nyambung jalai, bekal ai enggau elektrik di serata nengeri.
“Nambahka nya bisi beberapa projek infrastruktur bukai ke dipejalaika Kaunsil Pemansang Koridor Kandang Menua (RECODA) di baruh tiga ejensi iya nya Agensi Pemansang Tanah Tinggi (HDA), Agensi Pemansang Ulu Rajang (URDA) enggau Agensi Pemansang Kandang Menua Tengah (NRDA).
“Projek Jalai Besai Pan Borneo mega nyukung pengerembai ekonomi Sarawak ba taun 2019,” ku iya.
Wong madahka pekara nya lebuh ti nyimpul jurai Opis Menteri Wang ba hari Ke-7 Aum ke-2 penggal ke-3 Kunsil Nengeri Ke-18 ba Begunan DUN ditu, kemari.
Lebuh ti ngenang pasal Bajet Nengeri 2019, iya madahka belanja nya mekuh ngagai pemansang kelebih ngagai menua pesisir nengah agih sepenyampau RM9.073 bilion tauka 67 peratus ke tuju program pemansang lalu RM2.841 bilion (24 peratus) ke belanja operasyen.
Nya stratergi ke beguna dikena nyapai juluk Perintah Nengeri Sarawak ke deka ngenyampatka pemansang ngambika setipak enggau Semenanjung Malaysia, ngerapitka seraka pemansang entara mengeri enggau menua pesisir.
“Bajet Nengeri 2019 deka ngenyampatka pemansang ekonomi ngagai renggat ke tinggi sereta ulih nyadi menua maju lebuh manggai ba taun 2030.
“Ke pemadu beguna, bajet nya deka meri penguntung ngagai semua rayat Sarawak kelebih agi di menua pesisir,” ku iya ti mega Menteri Dagang Antarabansa enggau e-Dagang.
Kelimpah ari nya lebuh ke ngenang pasal chukai jual nengeri, Wong madahka pemutus perintah nengeri ti deka ngemeranka lima peratus chukai jual ngagai produk petroleum, ari baruh Konstitusyen Perintah Besai, iya nya di baruh Tusun 10, Bagian V, Seksyen 7 Konstitusyen Perintah Besai.
“Nya alai pemutus ngemeranka chukai jual tu sah ari sukut Konstitusyen,” ku iya.
Bejaku baru, iya madahka ari baruh Ordinan Chukai Dagang Nengeri 1998, Sarawak ngemeranka chukai jual ngagai minyak sawit mata, minyak puak leka sawit mata enggau tiket loteri, ti nyadi penatai pemisi nengeri.
“Kenyau chukaidagang nengeri diterit ba taun 1998, pemansut pemisi tu udah ngasilka puku rata RM550 juta kenyau lima taun ke udah.
“Taja pia, penatai pemisi tu jauh enda chukup dikena melanja agenda pemansang kitai,” ku iya.
Nya alai ku Wong, chukai dagang lima peratus produk petroleum engkeman amat dipejalaika perintah nengeri dikena nambahka belanja awakka ulih napi peminta guna rayat ti deka ke pemansang.
Nengah chukai dagang lima peratus nya deka meri awak ngagai Sarawak ngumpul penatai pemisi tambah RM3,897 bilion tauka urung 37 peratus ari semua penyampau anggar penatai pemisi RM10.513 bilion ba taun 2019.
“Sarawak begunaka mayuh penatai pemisi dikena nambahka kapasiti belanja dikena melanja semua infrastruktur enggau perengkaguna ke lama udah dianti sereta diguna rayat,” ku iya.