30 iku nembiak Tabika Kemas Kem Pakit, Salcra Pakit, Batu Lintang udah nemuai seraya belajar ngelingi Pasar Sri Aman

SRI AMAN: Sepenyampau 30 iku nembiak mit Tabika Opis Pemansang Mensia Mayuh (KEMAS) ari kelas Tabika KEMAS Kem Pakit, Sri Aman, Tabika KEMAS Salcra Pakit enggau Batu Lintang Undop udah nyereta Program Nemuai Seraya Belajar ngagai beberapa endur ti manah ngelingi Pasar Sri Aman semak ditu, pagi ensanus.

Pengajar ti ngulu penemuai nya, Norhayati Salleh madahka program nemuai tu ti ngaul 30 iku nembiak mit ari tiga buah tabika ba KEMAS Sri Aman bela disempulang tiga iku pemantu pengajar.

Nitih ku iya, penemuai tu mega nyadi siti ari aktiviti pelajar luar kelas kelimpah ari aktiviti dalam kelas.

“Aktiviti ti diatur kami ukai semina fokus ba pekara pelajar dalam kelas aja tang bala nembiak berengkah ari umur 4 ngagai 6 taun mega dibai ngelala dunya luar kelas sida baka aktiviti bejalai nemuai seraya belajar baka tu.

“Penemuai tu mega nyadi siti ari aktiviti ninting taun tabika ba Sri Aman kelimpah penemuai tu nampung pejalai nemuai seraya belajar ngagai Kuching bulan Oktober tu tadi,” ku iya nerang.

Rambau penemuai sekali tu, bala nembiak bisi dibai nemuai ngelawa Opis Bomba enggau Penyah Penusah Bagi Menua Sri Aman, Opis Polis Sri Aman, Pos Opis, Librari Sri Aman, Muzeum Warisan Sri Aman, Fun Planet di Unaco, Sri Aman sereta dibai merarau ba KFC Sri Aman.

Pia mega ku Norhayati, raban sida deka seruran ngatur pejalai nemuai ti sama ba taun baru.

Bela sama nyempulang pejalai nya, Pengajar Tabika KEMAS Batu Lintang, Janet Itu Peter, enggau dua iku pengajar Tabika KEMAS Salcra Pakit Kelas A enggau B, Korina Nelson Wright enggau Nurul Asnie @ Moni Ason.

NEMUAI SERAYA BELAJAR: Norhayati (empat kiba, belakang), Korina (dua kiba, belakang), Janet Itu (kanan), Nurul (dua kanan) begambar ungkup kenang begulai enggau bala nembiak Tabika KEMAS Sri Aman pengudah tembuka pejalai nemuai ngagai Pos Opis, Sri Aman pagi ensanus.