Enam iku ‘protege’ deka bepekit ba renggat kepenudi ‘Bintang Radio WAIfm Miri’
MIRI: Enam iku ‘ protege’ ti udah dipilih ba renggat ‘ battle’ deka bepekit ngerebut gelar champion ‘ Bintang Radio WAIfm Miri’ ba Ruang Legar Permy Mall Miri, 17 November tu.
Menijar Stesyen RTM Miri, Zaidi Bujang madahka sida tu udah mujur ba renggat nisih ba renggat ‘ battle’ lalu mujur ngagai renggat kepenudi ungkup taun 2018.
“Bintang Radio WAIfm Miri nyadi sebengkah program ‘ realiti radio’ ngiga penau baru ba industri pemerindang lalu sekali tu bisi enam protege udah bepekit ba renggat kepenudi kena Hari Enam tu,” ku iya madah ngagai Utusan Borneo kemari.
Zaidi madahka kesemua penyereta renggat kepenudi iya nya Alias Spikal, Emmnuel John, Christopher Lona, Velleza Anoi, Milous Bacuk enggau Anna Lyn.
Program tu dikeluarka RTM Miri enggau kerejasama Kelab Sosial MIRIfm enggau NAIM Group Of Companies ti berengkah diatur urung pukul 5 lemai.
“Batang tuju program realiti tu iya nya mantaika penau baru ba industri muzik ba Sarawak enggau Malaysia, seriris enggau Polisi Industri Kreatif Negara, RTM bejalaika pangku pengawa ngemayuhka agi asil tengkebang kreatif menua tu,” ku iya nerang.
Berebak enggau nya, meri awak tauka peransang ngagai raban nembiak nyadi artis kompeni rekoding.
Nya alai ku iya, semua sida ti rinduka lagu Iban serata Bumi Kenyalang, kelebih agi ba Mengeri Besai Miri ditesau datai meri sukung ngagai protege.
Pengeluar Begulai Bana Jimbat enggau Desmond Surai madahka Bintang Radio WAIfm Miri 2018 diatur sekali tu nyendiaka perais mata duit kesemua penyampau manggai RM5,100.
Champion deka nerima mata duit RM2,000, seraya lumur dua nerima RM1,000 enggau ketiga RM700.
Ba kategori Vokal Pemadu Manah, pemenang deka nerima perais mata duit RM500 enggau perais sagu ati RM300 siku disempulang trofi enggau setipikit.
Raban pengayur deka ngangauka tiga iku akim profesional enggau siku artis tebilang menua tu ( Iban), Rickie Andrewson ngambi ngerichahka agi pekit.