Ngambi ulih nambahka penemu enggau pemereti pasal e-Dagang sekalika di mengeri tauka di menua pesisir
KUCHING: Bungkur eDagang di Sarawak deka dikerembaika ngagai orang dagang menua pesisir di nengeri tu ngambika ulih meri peluang sereta ngerembus makit ti besai agi.
Menteri Dagang Antarabansa enggau E- Dagang, Dato Sri Wong Soon Koh madahka nya berindik ari ti nerima sukung ti manah ngagai program ke dipejalaika opis menteri sepemanjai taun tu.
Iya madahka opis menteri deka terus nempa kerejasama enggau ejensi ti bekaul dikena nambahka penemu enggau pemereti pasal e-Dagang di menua tu.
“Bepelasarka peminta ti chukup manah ba pengawa pemansang enggau latih e-dagang, opis menteri aku udah ngelangkar pelin ti mungkur semua pekara dikena ngenyakahka pengawa ngelatih mayuh agi orang dagang ba menua tu sama ngambi bagi ba pengawa dagang dalam talin taun baru.
“Opis menteri deka nempa kerejasama enggau ejensi perintah dikena nyampai tuju nya awakka ulih nambahka penemu enggau pemereti pasal e-Dagang sekalika di mengeri tauka di menua pesisir,” ku iya.
Wong mansutka pekara nya lebuh ti nyimpul jurai Opis Menteri Dagang Antarabansa enggau e- Dagang ba hari Ke-7, aum ke-2 penggal ke3 DUN Ke-18 ba Begunan DUN ditu, kemari.
Bejaku baru iya madahka opis menteri mega deka nyikap raban nembiak nyengkaum nembiak universiti sama ngemerankan pengelandik bedagang ngena chara ‘online’ awakka ngembuan mayuh pengelandik pengudah tembu belajar ila.
“Nambahnya opis menteri mega chakah ngatur program pemansang pengelandik enggau penyedar pasal e-Dagang ungkup mensia mayuh enggau orang dagang.
“Bisi 11 program ti udah nguntungka 3,415 iku ny- engkaum orang dagang, ketuai raban bansa, raban nembiak, nembiak institut pelajar tinggi sereta sekula ti diatur sepemanjai taun tu,” ku iya.
Entara 11 program ti dipejalaika iya nya Bengkel Dagang Nengah Chara online; Program eUsahawan Digital Kenyalang Achievers;Train the Trainers Programme; Seminar ekonomi Digital dan eDagang; E-Photo Presentation and Marketing Online; samarahan Apps Challenge; StartUp Quest, introduction to Digital Business moden sereta Transforming Digital business for Sarawak’s Youth and SMEs.
“Opis menteri mega bisi ngatur program penyedar eDagang ngagai raban bansa di menua pesisi ke dikumbai program ‘Kampung Reachout’.
“Dalam taun 2018, opis menteri aku ngatur program tu ba dua endur iya nya Betong enggau Skuau, Sibu ti meri penguntung ngagai 155 iku pesereta,” ku iya.
Kelimpah ari nya Wong madahka dikena meransang ngambika mayuh agi produk nengeri tu ngerebus makit dunya, opis menteri iya nyendiaka sukung enggau bantu ungkup orang dagang dalam pengawa pemandang dagang di menua tu enggau ba renggat dunya.
Iya madahka opis menteri nempa kerejasama rat enggau ejensi perintah, gerempung dagang enggau industri sereta dewan perniagaan ngenuku tauka ngelala bagi orang dagang ke patut diberi insentif.
“Naka bulan Oktober 2018, bisi 1,356 iku orang dagang bisi nerima sukung enggau bantu ari opis menteri ti nyereta beberapa pengawa pemandang lalu ngelakuka produk enggau servis sida,” ku iya.
Kitai mega bisi nempa kerejasama enggau ejensi perintah besai baka MATRADE ti nyendiaka beberap inisiatif dikena ngelakuka dagang antarabansa ku iya baka Market Development Grants (MDG) sereta program eTRADE and GoEx.
Program nya meri penguntung ngagai 17 iku orang dagang di nengeri tu ba taun 2018, ku Wong ti mega Menteri Wang.
Bepelasarka peminta ti chukup manah ba pengawa pemansang enggau latih e-dagang, opis menteri aku udah ngelangkar pelin ti mungkur semua pekara dikena ngenyakahka pengawa ngelatih mayuh agi orang dagang ba menua tu sama ngambi bagi ba pengawa dagang dalam talin taun baru. Dato Sri Wong Soon Koh Menteri Dagang Antarabansa enggau E-Dagang